काठमाडौं (हाम्रो खेलकुद) – आइसिसी विश्वकप लिग–२ त्रिकोणात्मक ओडिआई सिरिजमा नामिबियामाथि दुवै खेलमा नेपाल विजयी भएपछि ओमान एकदिवसीय विश्वकप छनोट भएको छ । नेपालले शनिबार नामिबियामाथि तीन विकेटको जित हात पार्यो ।

नेपालको जितसँगै ओमान भने शीर्ष तीनमा रहँदै आगमी जुन जुलाईमा हुने एकदिवसीय विश्वकप छनोटको लागि स्थान बनाएको छ । ओमानले ३६ खेलमा २१ मा जित र १३ मा हारका साथ ४४ अंकमा लिग २ सम्पन्न गरेको थियो । ४४ अंक माथि अव बाँकी सबै खेल जित्दा युएईमात्रै पुग्न सक्छ ।

त्यसैले ओमान शीर्ष तीनमा रहँदै एकदिवसीय विश्वकप छनोट खेल्ने पक्का भएको हो । नेपालले पहिलो खेलमा नामिबियालाई दुई विकेट र दोस्रो खेलमा तीन विकेटले पराजित गरेको थियो । नेपालसँगको हारले नामिबियालाई सिधै विश्वकप छनोटमा पुग्ने समिकरण कठिन बनाइदिएको छ ।

स्कटल्यान्ड ३४ खेलमा २३ मा जित र ९ मा हारसहित ४८ अंकका साथ शीर्ष स्थानमा रहँदै च्याम्पियन बनेको छ । अव शीर्ष तीनमा रहँदै ग्लोबल छनोट खेल्न नामिबिया, नेपाल र युएईबीच प्रतिस्पर्धा हुनेछ । यी तीन मध्य एक टोलीले शीर्ष तीनभित्र पर्दै विश्वकप छनोट सिधै खेल्न पाउने भएका हुन् । नेपालसँगको हारसँगै नामिबिया शीर्ष तीनमा पर्ने सम्भावना कठिन बनेको ।

लिग-२ का बाँकी पुछारका चार टोलीले भने आगमी मार्च अप्रिलमा नामिबियामा हुने क्वालिफायर प्ले अफ खेल्नुपर्ने हुन्छ । क्वालिफायर प्ले अफमा आइसिसी विश्वकप लिग २ का पुछारका चार टोलीसँगै क्यानडा र जर्सी गरि कुल ६ टोली हुनेछन् । शीर्ष दुई टोली पुन एकदिवसीय क्वालिफायरमा पुग्नेछन् ।

क्वालिफायर प्लेअफ अमेरिका र पपुवा न्युगिनीले खेल्ने पक्का भएको छ । नामिबिया, नेपाल र युएई मध्य दुई टोलीले खेल्नुपर्ने हुन्छ । एक टोली सोझै छनोटमा पुग्नेछ । नामिबिया ३३ खेलमा १८ मा जित र १४ मा हारसहित ३७ अंकका साथ तेस्रो स्थानमा छ । नामिबियाले अव स्कटल्यान्डसँग सोमबार खेल्नेछ । त्यसपछि युएईसँग दुई खेल खेल्नेछ । नामिबिया बाँकी तीन खेलमा विजयी हुँदा कुल ४३ अंकमा मात्रै पुग्न सक्छ । पराजित हुँदा भने नेपाल र युएईको नतिजामा भर पर्नेछ ।

नेपाल २७ खेलमा ११ मा जित र १४ मा हारसहित २४ अंकका साथ छैटौं स्थानमा छ । नेपाल बाँकी सबै खेलमा विजयी हुँदा कुल ४२ अंकमा पुग्नेछ । युएई २६ खेलमा १२ मा जित र ११ मा हारसहित २७ अंकका साथ पाँचौं स्थानमा छ । युएई सबै खेलमा विजयी हुँदा भने ४७ अंकमा पुग्नेछ ।

युएईले नेपालसँग चार र पपुवा न्युगिनीसँग चार चार खेल खेल्न बाँकी छ । त्यस्तै नामिबियासँग दुई खेल खेल्नेछ । युएईले आफ्नो घरेलु मैदानमा नेपाल, नामिबिया र युएईसँग समान दुई खेल खेल्नेछ । टियु क्रिकेट मैदानमा पपुवा न्युगिनी र नेपालसँग दुई दुई खेल खेल्नेछ । यता नेपालले घरेलु मैदान टियुमा युएई र पपुवा न्युगिनीसँग दुई दुई खेल खेल्नेछ । मंगलबार टियु क्रिकेट मैदानमा स्कटल्यान्डसँग खेल्नेछ । युएईमा गएर युएई र पपुवा न्युगिनीसँग दुई दुई खेल खेल्नेछ।

यता अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ । कम्तिमा अमेरिकालाई पछि पार्न नेपालले बाँकी ९ मध्य ६ खेल जित्नुपर्ने हुन्छ । अमेरिकालाई पछि पार्दा नेपालको ओडिआई मान्यता निरन्तरता पक्का हुनेछ । पपुवा न्युगिनी २८ खेलमा २ मा जित र २५ मा हारसहित ५ अंकका साथ पुछारमा छन् ।

को को खेल्छन् विश्वकप छनोटमा ?

जिम्बावेमा हुने विश्वकप छनोटमा १० टोली हुनेछन् । फाइनलमा पुग्ने दुई टोलीले आगमी अक्टोबर नोभेम्बरमा भारतमा हुने एकदिवसीय विश्वकप खेल्न पाउनेछन् । विश्वकप सुपर लिग-२ बाट च्याम्पियन स्कटल्यान्ड, ओमानसहित कुल तीन टोली हुनेछन् । प्लेअफ क्वालिफायरबाट दुई गरि पाँच टोली हुनेछन् । बाँकी पाँच टोली भने सुपर लिगबाट आउने छन् ।

सुपर लिगमा टेस्ट १२ टोली र नेदरल्यान्ड्स छन् । छनोटको सबैभन्दा माथिल्लो श्रेणीको रुपमा रहेको विश्वकप सुपर लिगमा १२ टेस्ट टोलीसँगै नेदरल्यान्ड्सले प्रतिस्पर्धा गरिरहेका छन् । आयोजक भारतसँगै इंग्ल्यान्ड, अष्ट्रेलिया, न्युजिल्यान्ड, बंगलादेश, अफगानिस्तान र पाकिस्तानले अंक तालिकामा बलियो प्रस्तुतिका साथ विश्वकपमा सोझै स्थान बनाएका छन् ।

आइसिसी सुपर लिगमा हरेक टोलीले कुल २४ खेल खेल्नुपर्ने छ । जसबाट आयोजक भारतसँगै शीर्ष ८ टोली सोझै विश्वकपमा पुग्नेछन् । पुछारका पाँच टोलीले ग्लोबल विश्वकप छनोट खेल्नुपर्ने हुन्छ । वेस्टइन्डिज २४ खेलमा ९ मा जित र १५ मा हारसहित ८८ अंकका साथ आठौं स्थानमा छ । दक्षिण अफ्रिका १९ खेलमा ७ मा जित र १० मा हारसहित ७८ अंकका साथ नवौं स्थानमा छ । दक्षिण अफ्रिकाले नेदरल्यान्ड्ससँग दुई खेल खेल्न बाँकी छ ।

श्रीलंका २१ खेलमा ७ मा जित र १२ मा हारसहित ७७ अंकका साथ १० औं स्थानमा छ । श्रीलंकाले न्युजिल्यान्डसँग तीन खेल खेल्नेछ । आयरल्यान्ड २१ खेलमा ६ मा जित र १३ मा हारका साथ ६८ अंकका साथ ११ औं स्थानमा छ । जिम्बावे २१ खेलमा ४ मा जित र १६ मा हारसहित ४५ अंकका साथ १२ औं स्थानमा छ । नेदरल्यान्ड्स १९ खेलमा २ मा जित र १६ मा हारकासाथ २५ अंक जोड्दै १३ औं स्थानमा छ ।

जिम्बावे र नेदरल्यान्ड्सले क्वालिफायर खेल्ने पक्का भएको छ । वेस्टइन्डिज, दक्षिण अफ्रिका, श्रीलंका र आयरल्यान्ड मध्य तीन टोलीले ग्लोबल छनोट खेल्नेछन् । दक्षिण अफ्रिकाले नेदरल्यान्ड्ससँग खेल्न बाँकी हुँदा पुछारमा रहँदै ग्लोबल छनोट खेल्ने पाँच टोलीमा वेस्टइन्डिज, श्रीलंका, आयरल्यान्ड, जिम्बावे र नेदरल्यान्ड्स देखिन्छन् ।