काठमाडौैं(हाम्रोे खेलकुद) – स्कटल्यान्डका तीव्र गतिका बलर क्रिस सोलले चोटका कारण आइसिसी विश्वकप लिग–२ अन्तर्गत त्रिकोणात्मक ओडिआई सिरिजमा नेपाल भ्रमणमा बाँकी दुई खेल गुमाउने भएका छन् । क्रिस सोल डिस्टल ह्यामस्ट्रिङ टेन्डन चोटका कारण बाँकी दुई खेल गुमाउने स्कटल्यान्डले क्रिकेट बोर्डले जनाएको छ ।

क्रिस सोल र शफ्यान शरिफ स्कटल्यान्डका प्रमुख खेलाडी हुन् । सोलले नेपालविरुद्ध १० ओभरमा ७२ रन खर्चेर ३ विकेट लिएका थिए । क्रिस सोलले कुशल भुर्तेल १६, आसिफ शेख ९ र ज्ञानेन्द्र मल्ललाई ४ रनमा आउट गरेका थिए । इनिङको पहिलो ओभरमा २३ रन खर्चिपनि तेस्रो ओभरमा कुशल र ज्ञानेन्द्रलाई आउट गर्दै नेपाललाई सुरुवातमा दबाबमा राखेका थिए ।

शरिफलाई स्कटल्यान्डले नेपालविरुद्ध खेलमा विश्राम दिएको थियो । क्रिस सोलले स्कटल्यान्डबाट २३ ओडिआई खेलमा ४२ विकेट लिएका छन् । स्कटल्यान्डले क्रिस सोलको स्थानमा विकाशको लागि लिएका युवा खेलाडी लियाम नेलरलाई मौका दिएको छ । २१ वर्षीय नेलरले स्कटल्यान्डबाट यू–१९ विश्वकप खेलि सकेका छन् ।

स्कटल्यान्ड ३४ खेलमा २३ मा जित र ९ मा हारसहित ४८ अंकका साथ शीर्ष स्थानमा छ । स्कटल्यान्ड तीन खेल अगावै च्याम्पियन बन्दै सिधैं विश्वकप ग्लोबल एकदिवसीय छनोटको लागि स्थान बनाएको छ । नेपाल भने २७ खेलमा ११ मा जित र १४ मा हारसहित २४ अंकका साथ छैटौं स्थानमा छ । नेपालले अव ९ खेल खेल्न बाँकी छ । शीर्ष तीनमा पर्न सबै खेल जित्नुपर्ने हुन्छ । शीर्ष पाँचमा रहँदै ओडिआई मान्यता जोगाउन ६ खेल जित्नुपर्ने हुन्छ ।

स्कटल्यान्डले पहिलो खेलमा नामिबियालाई १० विकेटले हराएको थियो । दोस्रो खेलमा नेपालविरुद्ध दुई विकेटले पराजित भएको थियो । स्कटल्यान्डले सोमबार नामिबिया र मंगलबार नेपालसँग खेल्नेछ ।