एजेन्सी – कप्तान टेम्बा बभुमाको शतकमा दक्षिण अफ्रिकाले दोस्रो ओडिआई खेलमा इंग्ल्यान्डमाथि ५ विकेटको सानदार जित हात पारेको छ । यो जितसँगै एक खेल अगावै सिरिज जित्नुको साथै सिधैं भारतमा हुने एकदिवसीय विश्वकप खेल्न पाउने सम्भावना पनि बलियो बनाएको छ ।

जितको लागि ३ सय ४३ रनको विशाल विजयी लक्ष्य पछ्याएको दक्षिण अफ्रिकाले ४९.१ ओभरमा ५ विकेट गुमाउँदै पूरा गर्यो । दक्षिण अफ्रिकाको जितमा कप्तान टेम्बा बभुमाले १ सय २ बलमा १४ चौका र १ छक्कासहित १ सय ९ रनको सानदार शतकीय इनिङ खेले । बभुमाको यो ओडिआई करिअरको तेस्रो शतक हो । उनी साम करनको बलमा बोल्ड आउट भए ।

डेविड मिलर ३७ बलमा २ चौका र ३ छक्कासहित ५८ रनमा अविजित रहँदै जित पक्का गरे । क्रिस वोक्सलाई मिलरले विजयी छक्का प्रहार गरेका थिए । ओपनर क्विन्टन डि कक र बभुमाले पहिलो विकेटका लागि ७७ रनको साझेदारी गरेका थिए । डि कक २८ बलमा ४ चौका र १ छक्कासहित ३१ रनमा आउट भए । दोस्रो विकेटका लागि बभुमा र रास्सी भान डर डुसेनले ९७ रनको साझेदारी गर्दै जितको आधार बनाएका थिए ।

रास्सी भान डर डुसेन ३८ बलमा ३ चौका र १ छक्कासहित ३८ रनमा आउट भए । एडेन माक्ररम ४३ बलमा ३ चौका र २ छक्कासहित ४९ रनमा आदिल राशिदको बलमा बोल्ड भए । हेनरिक क्लासेन २७ रनमा आउट हुँदा मार्को यानसन २९ बलमा ३२ रनमा अविजित रहे । इंग्ल्यान्डका आदिल राशिद र ओली स्टोनले दुई दुई विकेट लिए । साम करनले एक विकेट लिए ।

त्यसअघि टस हारेर पहिला ब्याटिङको निम्तो पाएको इंग्ल्यान्डले निर्धारित ५० ओभरमा ७ विकेट गुमाउँदै ३ सय ४२ रनको योगफल बनाएको थियो । इंग्ल्यान्डका कप्तान जस बटलर ८२ बलमा ८ चौका र ३ छक्कासहित सर्वाधिक ९४ रनमा अविजित रहेका थिए ।

मध्यक्रमका युवा ब्याटर ह्यारी ब्रुक ७५ बलमा ७ चौका र ४ छक्कासहित ८० रनमा आउट हुन पुगे । ओडिआई करिअरको सर्वाधिक रन बनाएपनि उनी एडेन माक्ररमको बलमा रास्सी भान डुसेनबाट क्याच आउट हुँदै शतक बनाउन चुकेका थिए ।

चौथो विकेका लागि बटलर र ब्रुकले ७३ रनको साझेदारी गरेका थिए । पाँचौं विकेटका लागि मोईन अली र बटलरले १ सय १ रनको शतकीय साझेदारी गर्दै विशाल योगफलको आधार तय गरेका थिए । तर त्यो योगफल जितको लागि पर्याप्त बनेन ।

मोईन अली ४४ बलमा ६ चौका र १ छक्कासहित ५१ रनमा एनरिच नोर्कियाको बलमा बोल्ड भए । ओपनर जेसन रोय ९, डेविड मलान १२, बेन डकेट २०, क्रिस वोक्स १४ र साम करन २८ रनमा आउट भए । साम करनले १७ बलमा १ चौका र ३ छक्का हानेका थिए ।

दक्षिण अफ्रिका एनरिच नोर्कियाले सर्वाधिक दुई विकेट लिए । वेन पार्नेल, लुन्गी एनगिडी, मार्को यानसन, केशव महाराज र एडेन माक्ररमले एक एक विकेट लिएका थिए ।

यो सँगै दक्षिण अफ्रिका सुपर लिगमा १८ खेलमा ७ मा जित र ९ मा हारसहित ७९ अंकका साथ नवौं स्थानमा छ । वेस्टइन्डिज २४ खेलमा ९ मा जित र १५ मा हारसहित ८८ अंकका साथ आठौं स्थानमा छ । श्रीलंका २१ खेलमा ७ मा जित र १२ मा हारसहित ७७ अंकका साथ १० औं स्थानमा छ । यी तीन मध्य एक टोली सिधैं विश्वकप खेल्नेछन् ।

दक्षिण अफ्रिकाले नेदरल्यान्ड्सँग दुई खेल खेल्न बाँकी छ । श्रीलंकाले न्युजिल्यान्डसँग तीन खेल खेल्न बाँकी छ । दक्षिण अफ्रिका यस जितले सोझै विश्वकप खेल्ने सम्भावना उच्च बनेको छ । इंग्ल्यान्ड र दक्षिण अफ्रिकाबीचको अन्तिम खेल बुधबार हुनेछ ।