एजेन्सी – कप्तान जस बटलर र युवा ब्याटर ह्यारी ब्रुकको उत्कृष्ट ब्याटिङमा इंग्ल्यान्डले दोस्रो ओडिआई खेलमा घरेलु टोली दक्षिण अफ्रिकालाई ३ सय ४३ रनको विशाल लक्ष्य दिएको छ । टस हारेर पहिला ब्याटिङको निम्तो पाएको इंग्ल्यान्डले निर्धारित ५० ओभरमा ७ विकेट गुमाउँदै ३ सय ४२ रन बनायो ।

इंग्ल्यान्डका कप्तान जस बटलर ८२ बलमा ८ चौका र ३ छक्कासहित सर्वाधिक ९४ रनमा अविजित रहे । ह्यारी ब्रुक ७५ बलमा ७ चौका र ४ छक्कासहित ८० रनमा आउट भए । ओडिआई करिअरको सर्वाधिक रन बनाएपनि उनी एडेन माक्ररमको बलमा रास्सी भान डुसेनबाट क्याच आउट हुँदै शतक बनाउन चुकेका थिए ।

चौथो विकेका लागि बटलर र ब्रुकले ७३ रनको साझेदारी गरेका थिए । पाँचौं विकेटका लागि मोईन अली र बटलरले १ सय १ रनको शतकीय साझेदारी गरेका थिए । मोईन अली ४४ बलमा ६ चौका र १ छक्कासहित ५१ रनमा एनरिच नोर्कियाको बलमा बोल्ड भए ।

ओपनर जेसन रोय ९, डेविड मलान १२, बेन डकेट २०, क्रिस वोक्स १४ र साम करन २८ रनमा आउट भए । साम करनले १७ बलमा १ चौका र ३ छक्का हाने ।

दक्षिण अफ्रिका एनरिच नोर्कियाले सर्वाधिक दुई विकेट लिए । वेन पार्नेल, लुन्गी एनगिडी, मार्को यानसन, केशव महाराज र एडेन माक्ररमले एक एक विकेट लिए । तीन ओडिआई खेलको सिरिजमा दक्षिण अफ्रिका १–० ले अघि छ ।