एजेन्सी – घरेलु टोली दक्षिण अफ्रिकाले पहिलो ओडिआई खेलमा इंग्ल्यान्डमाथि उत्कृष्ट पूनरागमन गर्दै २७ रनको जित हात पारेको छ । विश्वकप सुपर लिगमा महत्वपूर्ण १० अंक थपेको छ । जितको लागि २ सय ९९ रनको विजयी लक्ष्य पछ्याएको इंग्ल्यान्ड ४४.२ ओभरमा २ सय ७१ रनमा अल आउट भयो ।

इंग्ल्यान्डका ओपनर जेसन रोयले ९१ बलमा ११ चौका र ४ छक्कासहित १ सय १३ रनको शतकीय इनिङ खेलेपनि टोलीको हार टार्न सकेनन् । रोयको यो ११ औं ओडिआई शतक हो ।

अर्का ओपनर डेविड मलान ५५ बलमा ९ चौकासहित ५९ रनमा आउट भए । पहिलो विकेटका लागि मलान र रोयले १९.३ ओभरमा १ सय ४६ रनको सानदार शतकीय साझेदारी गर्दै उत्कृष्ट सुरुवात दिलाएका थिए । मलान सिसान्डा मगलाको बलमा कप्तान टेम्बा बभुमाबाट क्याच आउट भए ।

त्यसपछि इंल्यान्डले लगातार विकेट गुमाएपछि पराजित हुन पुग्यो । बेन डकेट ३, ह्यारी ब्रुक डक, जस बटलर ३६, मोईन अली ११, साम करन १७, डेविड विल्ली ८, आदिल राशिद १४, जोफ्रा आर्चर डक र ओली स्टोन एक रनमा आउट भए ।

दक्षिण अफ्रिका एचरिच नोर्कियाले १० ओभरमा ६२ रन खर्चेर ४ विकेट लिए । सिसान्डा मगलाले ९ ओभरमा ४६ रन खर्चेर ३ विकेट लिए । कागिसो रबाडाले १० ओभरमा ४६ रन खर्चेर २ विकेट लिए ।

त्यसअघि टस जितेर पहिला ब्याटिङ थालेको दक्षिण अफ्रिकाले निर्धारित ५० ओभरमा ७ विकेट गुमाउँदै २ सय ९८ रन बनाएको थियो । दक्षिण अफ्रिका जितमा रास्सी भान डुसेनले १ सय १७ बलमा ६ चौका र १ छक्कासहित १ सय ११ रनको शतकीय इनिङ खेलेका थिए ।

डेविड मिलरले ५६ बलमा ४ चौका र १ छक्कासहित ५३ रनमा आउट भए । पाँचौं विकेटका लागि डुसेन र मिलरले १ सय बलमा १ सय १० रनको शतकीय साझेदारी गरेका थिए ।

दक्षिण अफ्रिकालाई ओपनर टेम्बा बभुमा र क्विन्टन डि ककले ८.४ ओभरमा ६१ रनको साझेदारी गर्दै राम्रो सुरुवात दिलाए । डि कक ४१ बलमा ५ चौका र १ छक्कासहित ३७ तथा बभुमा २८ बलमा ४ चौका र १ छक्कासहित ३६ रनमा आउट भए ।

एडेन माक्ररम १३ र हेनरिक क्लासेन ३२ बलमा २ छक्कासहित ३० रनमा जोडे । इंग्ल्यान्डका तीव्र गतिका बलर साम करनले ९ ओभरमा ३५ रन खर्चेर ३ विकेट लिए । जोफ्रा आर्चर, मोईन अली, आदिल राशिद र ओली स्टोनले एक एक विकेट लिए । दोस्रो आइतबार हुनेछ ।