एजेन्सी – दक्षिण अफ्रिका तीव्र गतिका बलर मार्को यानसनले अफगानिस्तानका स्पिनर राशिद खानसँग गत वर्ष आइपिएलमा खाएको छक्का वर्षाको बदला लिएका छन् । दक्षिण अफ्रिकामा जारी एसए टि२० क्रिकेट प्रतियोगितामा सनराइजर्स इस्टर्न केपले एमआई केप टाउनलाई दुई विकेटले पराजित गर्दा यान्सनले पुरानो पिडाको बदला लिएका हुन् ।

जितको लागि १ सय ७२ रनको विजयी लक्ष्य पछ्याएको इस्टर्न केप टाउनले १९.३ ओभरमा ८ विकेट गुमाउँदै पूरा गर्यो । उसका लागि मार्को यानसनले २७ बलमा ३ चौका र ७ छक्कासहित ६६ रनको विष्फोटक इनिङ खेले । उनले राशिद खानलाई १६ औं ओभरमा चार छक्का र एक चौकासहित २८ रन बटुलेका थिए ।

गतवर्ष इन्डियन प्रिमियर लिग (आइपिएल) मा सनराइजर्स हैदराबादका यानसनलाई गुजरात टाइटन्सका राशिद खानलाई तीन छक्का हान्दै रोमान्चक जित दिलाएका थिए । जितको लागि १ सय ९६ रनको विजयी लक्ष्य पछ्याएको गुजरातलाई जिताउन राशिद खानले अन्तिम ओभरमा यानसनलाई दोस्रो, पाँचौं र अन्तिम बलमा छक्का हानेका थिए । उक्त आइपिएलको बदला यानसनले घरेलु मैदानमा लिएका छन् ।

आइपिएलकै फ्रेन्चाइज टोली सनराइजर्स हैदराबादको लगानी भएको सनराइजर्स इस्टर्न केपलाई जिताउन यानसनले सानदार प्रदर्शन गरे । एमआई केप टाउन भने मुम्बई इन्डियन्सको लगानी भएको टोली हो । एसए टि२० कपमा आइपिएलका ६ फ्रेन्चाइज टोलीको लगानी छ ।

सनराइजर्स इस्टर्न केपका यानसन बाहेक ट्रिस्टन स्टब्सले २१ बलमा ३ छक्कासहित २८ रन बनाए । स्टब्सले राशिद खानलाई ११ औं ओभरको दोस्रो, तेस्रो र पाँचौं बलमा छक्का हानेका थिए ।

कप्तान एडेन माक्ररम १२ र जोर्डन कक्सले १३ रन बनाए । एमआई केप टाउनका कागिसो रबाडाले ४ ओभरमा ३४ रन खर्चेर ३ विकेट लिए । जोफ्रा आर्चरले ४ ओभरमा १८ रन खर्चेर १ विकेट लिए । साम करनले ३.३ ओभरमा ४० रन खर्चेर १ विकेट लिए । राशिद खानले ४ ओभरमा ५३ रन खर्चेर १ विकेट लिए ।

त्यसअघि केप टाउनमा टस हारेर पहिला ब्याटिङको निम्तो पाएको एमआईले निर्धारित २० ओभरमा ६ विकेट गुमाउँदै १ सय ७१ रन बनायो । उसका लागि ग्रांट रोएलोफसेनले ३६ बलमा ७ चौका र २ छक्कासहित सर्वाधिक ५६ रन बनाएका थिए ।