काठमाडौं (हाम्रो खेलकुद) – धनगढी क्रिकेट एकेडेमी (डीसीए) को आयोजनामा दीपेन्द्र स्वार स्मृति स्कुल क्रिकेट प्रतियोगिता हुने भएको छ । प्रतियोगिता बिहीबार देखि धनगढीको फाप्ला क्रिकेट मैदानमा सुरु हुनेछ । प्रतियोगितामा २० स्कुलहरुको सहभागिता रहनेछ ।

माघ १६ गतेसम्म चल्ने प्रतियोगिता टी–२० फम्र्याटमा हुनेछ । प्रतियोगिता विजेताले ५० हजार र उपविजेता टोलीले ३० हजार पाउनेछन् । त्यस्तै प्लेयर अफ द टुर्नामेन्टले ५ हजार नगदसहित डीसीएमा ४ महिनाको छात्रवृत्तिमा क्रिकेट सिक्न पाउने डिसीएका व्यवस्थापक समुयल न्यौपानेले जानकारी दिए ।

वेस्ट बलर र बेस्ट ब्याटरले ३–३ हजार नगद र ३ महिनाको छात्रवृत्ति पाउनेछन् । डीसीएका पूर्व खेलाडी समेत रहेका दीपेन्द्र स्वारको सडक दुर्घटनामा निधन भएको थियो । आफ्नो छोराका स्मृतिमा परिवारले हरेक वर्ष क्रिकेट प्रतियोगिता गर्दै आएको छ ।
‘मेरो छोराको पनि खेलप्रति ठूलो रुचि थियो । खेलले अनुशासनमा बस्न र स्वास्थ्य नागरिक उत्पादनमा सहयोग पुर्याउँछ,’ दीपेन्द्रकी आमाबासु बम स्वारले भनिन्, ।

एकेडेमीका व्यवस्थापक न्यौपानेले स्कुललेभल देखि नै ग्रासरुट क्रिकेटको विकासमा योगदान पुगोस भन्ने उदेश्यले स्कुल स्तरीय प्रतियोगिता आयोजना गरिएको बताए ।

‘स्कुलमै थुप्रै क्रिकेटप्रति रुचि भएका प्रतिभावान खेलाडीहरु हुनुहुन्छ,’ न्यौपानेले भने, ‘उहाँहरुलाई उचित प्लेटफर्म दिन र उहाँहरुको प्रतिभा चिनि त्यसलाई तिखार्ने प्रतियोगिताको उद्देश्य हो ।’

डीसीएको स्कुल स्तरीय प्रतियोगिताबाट पहिचान भएका नारायण जोशी, बसन्त कार्कीलगायत खेलाडीहरु हाल राष्ट्रिय प्रतियोगिता खेलिरहेका छन् । प्रतियोगितालाई एसपीए कलेज, गुरुकुल एकेडेमी, गुरुजी सपिङ एण्ट सुटिङ, सिभिल बैंक, नवजीवन हस्पिटल तथा सौराई स्वायरलगायतले प्रायोजन गरि सहयोग गरेका छन् ।