काठमाडौं (हाम्रो खेलकुद) – उपाधिको प्रमुख दाबेदार नेपाल एपिएफ क्लब प्रधानमन्त्री कप महिला टि२० राष्ट्रिय प्रतियोगितामा सुदूरपश्चिमसँग चार विकेटले स्तब्ध भएको छ । योसँगै समूह ए बाट सुदूरपश्चिम विजेता र एपिएफ उपविजेता हुँदै सेमिफाइनलमा पुगेका छन् ।

जितको लागि ९२ रनको सामान्य विजयी लक्ष्य पछ्याएको सुदूरपश्चिमले १९.२ ओभरमा ६ विकेट गुमाउँदै पूरा गर्यो । सुदूरको जितमा डली भट्टले ३८ बलमा ४ चौका र १ छक्कासहित सर्वाधिक ३३ रन बनाइन् । कविता जोशी ५ बलमा १ चौकासहित ७ रनमा अविजित रहिन् । रेवती धामी ७ बलमा १ चौकासहित ८ रनमा अविजित रहिन् । ओपनर कविता कुँवर २, ऋतु कनोजिया १०, सम्झना खड्का २, विन्दु रावल र रुवि पोद्दार ६–६ रनमा आउट भए ।

एपिएफको लागि नेरी थापाले ४ ओभरमा १ मेडनसहित १० रन खर्चेर ३ विकेट लिइन् । सुमन विष्ट, इन्दु बर्मा र सीता रानामगरले एक एक विकेट लिए ।

त्यसअघि इटहरीको जनता क्रिकेट पार्कमा टस जितेर पहिला ब्याटिङ थालेको एपिएफले निर्धारित २० ओभरमा ९ विकेट गुमाउँदै सर्वाधिक ९१ रन बनायो । एपिएफको लागि ममता चौधरीले २६ बलमा २ चौकासहित २६ रन बनाइन् । ओपनर ज्योति पाण्डे १४, सीताराना मगर ४, इन्दु बर्मा ११, रोमा थापा १५, नेरी थापा ७ र रेखा रावलले ६ रन बनाइन् ।

सुदूरको लागि कविता जोशीले ४ ओभरमा १ मेडनसहित १५ रन खर्चेर ३ विकेट लिइन् । ऋतु कनोजियाले ४ ओभरमा १९ रन खर्चेर २ विकेट लिइन् । कविता कुँवर र मनिषा चौधरीले एक एक विकेट लिइन् ।

सुदूरपश्चिमले सेमिफाइनलमा समूह बी को उपविजेतासँग खेल्नेछ । बुधबार लुम्बिनी र मधेशबीचको खेलको विजेता समूह बी को उपविजेता बन्नेछ । समूह ए को उपविजेता एपिएफले समूह बी को विजेता प्रदेश एकसँग सेमिफाइनलमा प्रतिस्पर्धा गर्नेछ ।