दिपेन्द्र पोखरेल (बिराटनगर) – विश्वमै सबैभन्दा बढी फ्यान फलोइङ खेलाडीकै छन् । नेपाल पनि त्यसबाट अछुतो छैन । त्यसको एउटा उदाहरण पूर्वाञ्चलमा जारी सातौं राष्ट्रिय खेलकुदको क्रिकेटलाई पछ्याउँदा थाहा हुन्छ । नेपाली क्रिकेटलाई पछ्याउने र नेपाली खेलाडीका पूर्वेली फ्यान यतिखेर दंग छन् । अन्तर्राष्ट्रिय क्रिकेटमा समेत उच्च प्रदर्शनका साथ चर्चा कमाइरहेको नेपाली स्टार खेलाडी आफ्नै क्षेत्रमा आएर खेल्दा यहाँका समर्थकले उनीहरुको खेल हेर्ने मौका किन चुकाउथे ।

मोरङको बैजनाथपुर स्थित मैदानमा सातौ राष्ट्रिय खेलकुदको क्रिकेटअन्तर्गत बुधबारको खेल हेर्न समर्थकहरुको बाक्लै उपस्थिति थियो । अन्तर्राष्ट्रिय स्तरमै ख्याती कमाएका खेलाडीलाई आफ्नो सामुन्ने देख्न पाउँदा स्थायिय समर्थक दंग देखिन्थे । अन्तर्राष्ट्रिय क्रिकेट हुँदा टिभिमा खेल हेरेर आनन्द मान्ने समर्थहरुले अहिले आफ्नै ठाँउको मैदानमा प्रत्यक्ष उनीहरुको खेलको आनन्द उठाउने मौका छाड्ने कुरै भएन । नेपाली राष्ट्रिय खेलाडी सम्मिलित टोलीको खेल हर्न दर्शकहरुको उपस्थिति पनि राम्रो हुने गरेको छ । त्यसबाट पनि भन्न सकिन्छ नेपालमा खेलाडीको फ्यान फलोइङ राम्रो छ ।

समूह एबाट सेमिफाइनलमा पुगिसकेका एपिएफ र त्रिभुवन आर्मी क्लबबीच बुधबार समूह विजेताका लागि प्रतिस्पर्धा हुँदा पनि दर्शकको बाक्लो उपस्थिति थियो । अधिकांश दर्शक एपिएफलाई समर्थन गरिरहेको थिए । त्यसको पहिलो कारण थियो, टोलीका कप्तान पारस खड्का । राष्ट्रिय टोलीका कप्तान समेत रहेका पारस सम्भत समकालिन खेलाडीमा सबैभन्दा चर्चित, सफल र फ्यान फलोइङ भएका खेलाडी हुन् ।
पारससहित राष्ट्रिय टोलीका उपकप्तान ज्ञानेन्द्र मल्ल , शक्ति गौचन , बसन्त रेग्मी जस्ता चर्चित अनुहार एपिएफमै हुनुले पनि स्थानिय दर्शकको साथ पाएको हुनुपर्दछ । त्यो खेल एपिएफले २८ रनले जितेको थियो । एएिफको जितमा निकै खुशी देखिन्थे समर्थकहरु । उनीहरु यति उत्साहित थिए की खेलाडीलाई मैदानबाट बस सम्म पुग्न पनि कठिन भइरहेको थियो । मैदानदेखि बससम्म पनि समर्थकले खेलाडीलाई पछ्याइरहेका थिए । खेलपछि खेलाडीसँग अटोग्राफ लिनु र सेल्फी खिच्नु उनीहरुको प्राथमिकतामा थियो ।

क्रिकेटरहरु विराटनगरमा निकै रुचाइए, त्यसमा पनि पारस केन्द्रमा थिए । मैदान बाहिरिदा उनी समर्थकको घेरामा परि हाल्थे । उनीसँग सेल्फी खिच्न समर्थकमा एकखालको प्रतिस्पर्धानै देखिन्थ्यो । बुधबारको खेलमा पनि त्यहि दृष्य दोहोरियो । समर्थकबाट पारस यति घेरिएकी भिड छलेर बससम्म पुग्न पनि उनले सुरक्षाकर्मीको सहयोग लिनुपर्यो । त्यसअघि नम्रता र धैर्यतापूर्व पारसले समर्थकलाई समय दिए ।

पारसको क्रेज भिडियोमा हेरौं ।