काठमाडौं (हाम्रो खेलकुद) – नेपाल टि२० लिगको फ्रेन्चाइज टोली जनकपुर रोयल्स पुनः समयमै मैदान आएको छैन । मंगलबार जनकपुर रोयल्सले दोस्रो क्वालिफायर खेलमा विराटनगर सुपर किंग्ससँग प्रतिस्पर्धा गर्दै छ । निर्धारित समय अनुसार टस बिहान ११ : ३० मा हुनुपर्ने हो ।

टिमको रिपोर्टिङ समय बिहान ११ बजे हो । तर जनकपुरको टोली मैदान आएको छैन । टसको समय भन्दा १० मिनेट ढिलो हुँदा समेत जनकपुरको टोली टियु मैदान आइपुगेको छैन ।

होटलबाट जनकपुर १० मिनेट अघि हिडेको बुझिएको छ । जनकपुर रोयल्सले लगातार तेस्रो पटक समयमै मैदान आउन ढिलो गरेको हो । जनकपुर पहिलो क्वालिफायरमा लुम्बिनी अल स्टार्सविरुद्ध पनि समयमा मैदान आएको थिएन । त्यस्तै लिगमा पोखरा एभेन्जर्सविरुद्ध पनि समयमा मैदान आएको थिएन । खेलाडीले पैसा नपाएको कारण लगातार ढिलो गर्दै आएका छन् ।

जनकपुर पहिलो क्वालिफायरमा लुम्बिनीसँग ६ रनले पराजित भएको थियो । खेलपछि उपकप्तान सोमपाल कामीले आफ्नो टिमका म्याच विनर चाडविक वाल्टन होटलमै रहेको बताएका थिए । विराटनगरको टोली भने वार्मअपमा ब्यस्त रहेको छ । म्याच अफिसियल र विराटनगरको टोली जनकपुरको टोलीको पर्खाईमा छन् ।

विराटनगरले भने एलिमिनेटर खेलमा काठमाडौं नाइट्सलाई ९९ रनले हराउँदै दोस्रो क्वालिफायरमा स्थान बनाएको थियो । यस खेलको विजेताले बुधबार लुम्बिनीसँग फाइनलमा प्रतिस्पर्धा गर्नेछ ।

यो पनि पढ्नुहोस् : पानी दिने खेलाडी पनि टोलीमा नभएपछि…

जव विकेटकिपरले बलिङ गर्नु पर्यो…

* अपडेट : जनकपुरको टोली १२ बजे टियु मैदान आइपुगेको छ । टस १२: १५ मा र खेल १२: ३० मा सुरु हुनेछ ।