काठमाडौं (हाम्रो खेलकुद) – लुम्बिनी अल स्टार्सले नेपाल टि२० लिगको पहिलो क्वालिफायरमा जनकपुर रोयल्सलाई ६ रनले हराउँदै फाइनलमा स्थान बनाएको छ । जितको लागि १ सय ४४ रनको विजयी लक्ष्य पछ्याएको जनकपुरले २० ओभरमा ७ विकेट गुमाउँदै १ सय ३७ रन बनायो ।

जनकपुरका समिउल्लाह शिनवारीले ३१ बलमा २ चौका र ३ छक्कासहित सर्वाधिक ४५ रन बनाए । ओपनर शराफुद्दिन अशरफ १९ बलमा ४ चौका र १ छक्कासहित २४ रनमा आउट भए । कप्तान ट्रेभोन ग्रिफिथ १०, दीलिप नाथ शून्य, सन्दीप जोरा २ र अशायन प्रियन्जन ७ रनमा आउट भए ।

जनकपुरलाई अन्तिम १२ बलमा जितको लागि ३३ रन चाहिँएको थियो । शिनवारीले सुरुवाती दुई बलमा साड्ली भान स्केलक्किकलाई लगातार दुई छक्का हाने । तेस्रो बलमा क्याच आउट भए । त्यसपछि पवन सरार्फले पाँचौं बलमा चौका र अन्तिम बलमा छक्का हानेपछि खेल रोचक बनेको थियो । १९ औं ओभरमा साड्लीले समग्रमा २३ रन खर्चिए ।

अन्तिम ६ बलमा जितको लागि १० रन चाहिँएको थियो । किशोर महतोले पहिलो बल एक रन लिँदा दोस्रो बलमा पवनले रन लिएनन् । तेस्रो बल डट राखे । चौथो बलपनि डट राखेपछि लुम्बिनी जिततर्फ अघि बढेको थियो । तर किशोरले लेन्थको बलमा डट राखे । पवन सरार्फ १९ बलमा २ चौका र २ छक्कासहित ३० रनमा अविजित रहे ।

लुम्बिनीका विपुल शर्माले ४ ओभरमा २१ रन खर्चेर २ विकेट लिए । सागर ढकालले ३ ओभरमा २० रन खर्चेर २ विकेट लिए । दीपेन्द्रसिंह ऐरीले ३ ओभरमा १ मेडनसहित ९ रन खर्चेर २ विकेट लिए ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको लुम्बिनीले निर्धारित २० ओभरमा ८ विकेट गुमाउँदै १ सय ४३ रन बनायो ।लुम्बिनीका ईशान पाण्डेले ३९ बलमा ३ चौका र १ छक्कासहित सर्वाधिक ३८ रन बनाए । ओपनर हरम्रीत सिंह शून्यमा बोल्ड भए । स्पिनर अशायन प्रियन्जनको इनिङको पहिलो बलमै उनलाई आउट गरेका थिए ।

प्रियन्जनले कुशल भुर्तेललाई ३ रनमा क्याच गराए । सोमपाल कामीले लाहिरु मिलान्थालाई १६ रनमा विकेटकिपर दीलिप नाथबाट क्याच गराएपछि २९–३ को अवस्थामा पुगेको थियो । जितेन्द्र मुखियाले दीपेन्द्रसिंह ऐरीलाई १० रनमा नाथबाट क्याच गराएपछि समस्यामा परेको थियो । पाँचौं विकेटका लागि अनिल कुमार शाह र ईशान पाण्डेले ६२ रनको साझेदारी गरे । अनिल २६ बलमा २ चौकासहित २४ रनमा आउट भए । तल्लोक्रमका विपुल शर्मा १३ बलमा २ छक्कासहित २० रन बनाए । साड्ली भान स्केलक्किकले ८ बलमा २ चौका र १ छक्कासहित १७ रनमा अविजित रहे ।

जनकपुरका सोमपाल कामीले ४ ओभरमा १ मेडनसहित १९ रन खर्चेर २ विकेट लिए । अशान प्रियन्जनले ३ ओभरमा १६ रन खर्चेर २ विकेट लिए । जितेन्द्र मुखियाले २ ओभरमा १५ खर्चेर २ विकेट लिए । ट्रेभोन ग्रिफिथ र पवन सरार्फले एक एक विकेट लिए ।

सोमबार एलिमिनेटर खेलमा विराटनगर सुपर किंग्स र काठमाडौं नाइट्सबीच प्रतिस्पर्धा हुनेछ । जसको विजेताले मंगलबार दोस्रो क्वालिफायरमा जनकपुरसँग खेल्नेछ । फाइनल बुधबार हुनेछ ।