एजेन्सी – श्रीलंकाका कप्तान दासुन शानकाले दोस्रो टि२० आई खेलमा घरेलु टोली भारतविरुद्ध कीर्तिमनी ब्याटिङ गरेका छन् । शानकाले विष्फोटक ब्याटिङ गरेपछि श्रीलंकाले भारतलाई २ सय ७ रनको विशाल लक्ष्य दिएको छ।

पुणेमा टस हारेर पहिला ब्याटिङको निम्तो पाएको श्रीलंकाले निर्धारित २० ओभरमा ६ विकेट गुमाउँदै २ सय ६ रन बनायो । दासुन शानका २२ बलमा २ चौका र ६ छक्कासहित ५६ रनमा अविजित रहे । अन्तिम ओभरको चौथो बलमा शिवम माभीलाई छक्का हान्दै शानकाले २० बलमा अर्धशतक पूरा गरेका थिए ।

श्रीलंकाबाट टि२० आईमा यो सर्वाधिक छिटो अर्धशतक हो । शानकाले श्रीलंका पूर्व कप्तान कुमार संगकारा र महेला जयवर्धनलेको कीर्तिमान तोड्दै नयाँ इतिहास रचेका हुन् । यसअघि महेला जयवर्धनले केन्याविरुद्ध २००७ मा २१ बल, कुमार संगकाराले भारतविरुद्ध २००९ मा २१ बल र कुशल परेराले भारतविरुद्धनै २०१८ मा २२ बलमा टि२० आईमा अर्धशतक प्रहार गरेका थिए ।

भारतविरुद्ध शानकाको इतिहास टि२० मा धेरै राम्रो छ । पहिलो खेलमा भारतविरुद्ध २७ बलमा ४५ रन बनाएका थिए । एसिया कपमा भारतलाई हराउन शानकाले १८ बलमा ३३ रनमा अविजित रहेका थिए । गत फेब्रुअरीमा धर्मशालामा शानकाले भारतविरुद्ध ३८ बलमा ७४ रन बनाएका थिए । समग्रमा भारतविरुद्ध शानकाले ५ इनिङमा २०५.६४ को स्ट्राइकरेटमा २ सय ५५ रन बनाएका छन् ।