काठमाडौं (हाम्रो खेलकुद) – कप्तान रोहित पौडेलको अर्धशतकमा विराटनगर सुपर किंग्सले नेपाल टि२० लिगमा फार वेस्ट युनाइटेडलाई ६ विकेटले हराउँदै प्लेअफ सम्भावना कायमै राखेको छ ।

जितको लागि १ सय ५७ रनको विजयी लक्ष्य पछ्याएको विराटनगरले १९.३ ओभरमा ४ विकेट गुमाउँदै पूरा गर्यो । विराटनगरका कप्तान रोहित पौडेलले ४२ बलमा ४ चौका र २ छक्कासहित सर्वाधिक ६० रन बनाए । रोहितको यो जारी प्रतियोगिता दोस्रो अर्धशतक हो ।

ओपनर प्रदीप ऐरीले २६ बलमा ४ चौका र २ छक्कासहित ४० रनमा आउट भए । गौरांशु शर्मा १० बलमा २ चौकासहित ११ रनमा आउट भए । हुसेन तालत १५ बलमा १ चौकासहित १७ रनमा आउट भए ।

पृथु बाँस्कोटा १९ बलमा १ चौकासहित १७ रनमा अविजित रहे । विवेक यादव ४ रनमा अविजित रहे । फार वेस्टका करण केसी, प्रकाश जैशी, नुर अहमद र हश्मातुल्लाह शाहिदीले एक एक विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको युनाइटेडले निर्धारित २० ओभरमा ९ विकेट गुमाउँदै १ सय ५६ रन बनायो । युनाइटेडका विनोद भण्डारीले ३८ बलमा ६ चौका र २ छक्कासहित सर्वाधिक ४५ रन बनाए । विनोद भण्डारी रन आउट हुँदा युनाइटेड १०।३ ओभरमा ७७–२ को बलियो अवस्थामा थियो । तर त्यसपछि लगातार विकेट गुमायो । ओपनर देव खनाललाई दोस्रो ओभरमै युनाइटेडले दुई रनमै गुमाएको थियो ।

९ बल खेलेका देव राज नन्ननको बलमा बोल्ड भए । दोस्रो विकेटका लागि विनोद भण्डारी र हश्मातुल्लाह शाहिदीले ६८ रनको साझेदारी गरेका थिए । त्यसपछि क्रिजमा आएका उमेर अली १६ र मिलिन्डा सिरिवर्धन १४ रनमा आउट भए । नुर अहमद ६ र भीम सार्की २ रनमा बोल्ड भए ।

उमेर, नुर र भीम तीनै ब्याटर स्पिनर साहब आलमको बलमा बोल्ड भए । राशिद खान ९ र प्रकाश जैशी शून्यमा आउट भए । करण केसी ११ बलमा १ चौका र २ छक्कासहित २१ रनमा अविजित रहे ।

विराटनगरका साहब आलमले ४ ओभरमा ४३ रन खर्चेर ३ विकेट लिए । केओन जोशेफले ४ ओभरमा २५ रन खर्चेर २ विकेट लिए । राज नन्नन, विवेक यादव र रोहित पौडेलले एक एक विकेट लिए ।

अंक तालिका

लुम्बिनी ९ खेलमा ८ मा जित र १ हारसहित १६ अंकका साथ शीर्षस्थानमा छ । अन्तिम खेल लुम्बिनीले शुक्रबार जनकपुरसँग खेल्नेछ । उक्त खेलमा हारेपनि शीर्ष स्थानमै रहनेछ । जनकपुर रोयल्स ८ खेलमा ५ मा जित र ३ मा हारसहित १० अंकका साथ दोस्रो स्थानमा छ ।

काठमाडौं ८ खेलमा ४ मा जित र ४ मा हारसहित ८ अंकका साथ तेस्रो स्थानमा छ । पोखरा ८ खेलमा ३ मा जित र ५ मा हारसहित ६ अंकका साथ चौथो स्थानमा छ । विराटनगर सुपर किंग्स ८ खेलमा ३ मा जित र ५ मा हारसहित ६ अंकका साथ पाँचौं स्थानमा छ । विराटनगर प्लेअफमा पुग्न बाँकी सबै खेल जित्नुपर्ने हुन्छ ।

फार वेस्ट युनाइटेड ७ खेलमा १ मा जित र ६ मा हारसहित पुछारमा छ । फार वेस्ट प्लेअफमा पुग्न पोखरा र विराटनगर दुबैले फराकिलो अन्तरले हार्नुपर्छ । फार वेस्टले बाँकी तीनै खेलमा सबै जित हात पार्नुपर्ने हुन्छ ।