काठमाडौं (हाम्रो खेलकुद) – लुम्बिनी अल स्टार्सले नेपाल टि२० लिगमा काठमाडौं नाइट्सविरुद्ध टस जितेर पहिला ब्याटिङ गर्ने निर्णय लिएको छ । टियु क्रिकेट मैदानमा टस जितेर लुम्बिनीका कप्तान दीपेन्द्रसिंह ऐरीले पहिला ब्याटिङ गर्ने निर्णय लिएका छन् ।

काठमाडौंको टोली ढिलो आएपछि खेल तीन ओभर घटेको छ । काठमाडौंको टोली बिहान ८ ः ४८ मा टियु आएको थियो । तर टस विहान ८ ः ३० मा हुनु पर्ने थियो । ढिलो टस भएपछि खेल १७–१७ ओभरकोे हुनेछ । काठमाडौंका खेलाडीले पारिश्रमिक नपाएपछि क्रिकेट नखेल्ने शर्त राख्दै आएका छन् ।

मंगलबार विराटनगर सुपर किंग्स र काठमाडौंबीचको खेल साढे दुई घण्टा ढिलो सुरु भएको थियो । अल स्टार्सले भने घाइते लेगस्पिनर तिलकराज भण्डारीको स्थानमा ईशान पान्डेलाई मौका दिएको छ । ईशान पाण्डेले नेपाल टि२० लिगमा पहिलो खेल खेल्दैछन् । टोलीमा अन्य भने परिवर्तन छैन ।

काठमाडौंले आज गौतम केसीको स्थानमा सौरभ खनाललाई मौका दिएको छ । विष्फोटक ब्याटर सौरभ खनाल यसअघि सबै खेलमा बेन्चमा थिए । लुम्बिनी ८ खेलमा ७ मा जित र १ मा हारसहित १४ अंकका साथ शीर्षस्थानमा छ । काठमाडौं ७ खेलमा ४ मा जित र ३ मा हारसहित ८ अंकका साथ तेस्रो स्थानमा छन् ।

काठमाडौं प्लेइङ ११ : ज्ञानेन्द्र मल्ल (कप्तान), लोकेश बम (विकेटकिपर), बसिर अहमद, कमलसिंह ऐरी, अभिनाश बोहरा, अनिल खरेल, सौरभ खनाल, सन्दीप रजाली, सुनम गौतम, विरनदीप सिंह र एलेक्स ब्लेक ।

लुम्बिनीको प्लेइङ ११ : दीपेन्द्रसिंह ऐरी, अनिल कुमार शाह, कुशल भुर्तेल, गुलशन झा, योगेन्द्रसिंह कार्की, किशोर महतो, ईशान पाण्डे, लाहिरु मिलान्था, ह्यारी टेक्टर, विपुल शर्मा र हरमीत सिंह ।