काठमाडौं (हाम्रो खेलकुद) – काठमाडौं नाइट्सले नेपाल टि२० लिगमा विराटनगर सुपर किंग्समाथि ३४ रनको सहज जित हात पार्दै प्लेअफको सम्भावना मजबुत बनेको छ । जितको लागि ९३ रनको प्रतिस्पर्धात्मक लक्ष्य पछ्याएको विराटनगरले ८.५ ओभरमा ५८ रनमा अल आउट भयो ।

विराटनगरका गौरांशु शर्माले १३ बलमा २ चौका र १ छक्कासहित सर्वाधिक २२ रन बनाए । विवेक यादवले १५ बलमा १२ रन बनाए । नन्दन यादवले ११ रन बनाए । विराटनगरका अन्य कुनैपनि ब्याटरले राम्रो प्रदर्शन गर्न सकेनन् ।

ओपनर अर्जुन साउद एक, हुसेन तालत ८, कप्तान रोहित पौडेल २ र राज नन्नन शून्यमा आउट भए । काठमाडौंका कमलसिंह ऐरीले १.५ ओभरमा १३ रन खर्चेर ३ विकेट लिए । अनिल खरेलले २ ओभरमा ११ रन खर्चेर २ विकेट लिए । सुनम गौतमले १ ओभरमा तीन रन खर्चेर २ विकेट लिए । बसिर अहमद र अभिनाश बोहरा एक एक विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ रोजेको काठमाडौंले निर्धारित ९ ओभरमा ५ विकेट गुमाउँदै ९२ रन बनाएको थियो । काठमाडौंका सन्दीप रजाली २२ बलमा २ चौका र २ छक्कासहित सर्वाधिक ३२ रनमा अविजित रहे । रजालीले नेपाल टि२० लिगको पहिलो खेल खेलेका हुन् । जिम्बावेका अलराउन्डर रायन बर्ल घर फर्किएपछि सन्दीप रजालीले मौका पाएका हुन् ।

कमलसिंह ऐरी ५ बलमा २ छक्कासहित १४ रनमा अविजित रहे । ओपनर लोकेश बम एक र विरनदीप सिंह पाँच रनमा आउट भए । नन्दन यादवले सुनम गौतमलाई शून्यमा बोल्ड गरे । एक समय काठमाडौं १४–३ को कमजोर अवस्थामा पुगेको थियो । चौथो विकेटका लागि एलेक्स ब्लेक र सन्दीप रजालीले ३२ रनको साझेदारी गरेका थिए ।

एलेक्स ब्लेक ९ बलमा २ चौकासहित १३ रनमा आउट भए । ज्ञानेन्द्र मल्ल ११ बलमा १ चौकासहित १४ रनमा आउट भए । विराटनगरका नन्दन यादवले २ ओभरमा एक मेडनसहित ८ रन खर्चेर ३ विकेट लिए । हुसेन तालत र केओन जोशेपले एक एक विकेट लिए ।

खेलाडीहरुले पारिश्रमिक नपाएको कारण विहान निर्धारित समयमा टस हुन सकेको थिएन । लामो समयको छलफलपछि सहमति भएको थियो । निर्धारित समय ८:३० मा टस हुनुपर्ने भएपनि टस १०ः३० मा भएको थियो ।

अंक तालिका

लुम्बिनी अल स्टार्स ७ खेलमा ६ मा जित र १ हारसहित १२ अंक जोड्दै शीर्षस्थानमा छ । लुम्बिनी प्लेअफ पुगि सकेको छ । जनकपुर ७ खेलमा ५ मा जित र २ मा हारसहित १० अंक जोड्दै प्लेअफ नजिक छ । काठमाडौं ७ खेलमा ४ मा जित र ३ मा हारसहित ८ अंकका साथ तेस्रो स्थानमा छ । पोखरा र विराटनगर भने १० अंकका साथ प्लेअफ खेल्न खोज्नेछन् । तर धेरै कठिन बनि सकेको छ ।

पोखरा ८ खेलमा ३ मा जित र ८ मा हारसहित ६ अंकका साथ चौथो स्थानमा छ । पोखरा बाँकी दुई खेल जित्दा १० अंकका साथ प्लेअफ खेल्नेछ । विराटनगर ७ खेलमा ७ खेलमा २ मा जित र ५ मा हारसहित पाँचौं स्थानमा छ । फार वेस्ट युनाइटेड ६ खेलमा १ मा जित र ५ मा हारसहित पुछारमा छ ।