काठमाडौं (हाम्रो खेलकुद) – काठमाडौं नाइट्सले नेपाल टि२० लिगमा विराटनगर सुपर किंग्सलाई ९३ रनको लक्ष्य दिएको छ । टियु क्रिकेट मैदानमा टस जितेर पहिला ब्याटिङ रोजेको काठमाडौंले निर्धारित ९ ओभरमा ५ विकेट गुमाउँदै ९२ रन बनायो ।

काठमाडौंका सन्दीप रजाली २२ बलमा २ चौका र २ छक्कासहित सर्वाधिक ३२ रनमा अविजित रहे । रजालीले नेपाल टि२० लिगको पहिलो खेल खेलेका हुन् । जिम्बावेका अलराउन्डर रायन बर्ल घर फर्किएपछि सन्दीप रजालीले मौका पाएका हुन् ।

कमलसिंह ऐरी ५ बलमा २ छक्कासहित १४ रनमा अविजित रहे । ओपनर लोकेश बम एक र विरनदीप सिंह पाँच रनमा आउट भए । नन्दन यादवले सुनम गौतमलाई शून्यमा बोल्ड गरे । एक समय काठमाडौं १४–३ को कमजोर अवस्थामा पुगेको थियो । चौथो विकेटका लागि एलेक्स ब्लेक र सन्दीप रजालीले ३२ रनको साझेदारी गरेका थिए ।

एलेक्स ब्लेक ९ बलमा २ चौकासहित १३ रनमा आउट भए । ज्ञानेन्द्र मल्ल ११ बलमा १ चौकासहित १४ रनमा आउट भए । विराटनगरका नन्दन यादवले २ ओभरमा एक मेडनसहित ८ रन खर्चेर ३ विकेट लिए । हुसेन तालत र केओन जोशेपले एक एक विकेट लिए ।

खेलाडीहरुले पारिश्रमिक नपाएको कारण विहान निर्धारित समयमा टस हुन सकेको थिएन । लामो समयको छलफलपछि सहमति भएको थियो । निर्धारित समय ८ : ३० मा टस हुनुपर्ने भएपनि टस १०ः३० मा भएको थियो ।