काठमाडौं (हाम्रो खेलकुद) – अफगानिस्तानका युवा स्पिन अलराउनडर नुर अहमदले आज नेपाल टि२० लिग खेल्दै छन् । नुर अहमदले फार वेस्ट युनाइटेडबाट जनकपुर रोयल्सविरुद्ध डेब्यू गरेका छन् । टियु क्रिकेट मैदानमा भएको टसमा फार वेस्ट युनाइटेडले जितेर पहिला फिल्डिङ गर्ने निर्णय लिएका हुन् ।

१७ वर्षीय बायाँ हाते स्पिनर नुरले अफगानबाट एक ओडिआई र एक टि२० आई खेल खेलेका छन् । राशिद खान, मुजिब उर रहमान र मोहम्मद नाबीको छायाँको कारण अफगानस्थानको टोलीमा मौका पाउन सकेका छैनन् । तर उनले विदेशी फ्रेन्चाइज लिगमा भने सानदार प्रदर्शन गर्दै आएका छन् । तल्लोक्रममा राम्रो ब्याटिङ समेत गर्दछन् ।

फार वेस्टले हरिशंकर शाह र हासिम अन्सारीलाई बेन्चमा राखेको छ । पाँच खेलपछि पहिलो पटक चार विदेशी खेलाडी खेलाएको छ । फार वेस्टको टोलीमा श्रीलंका अलराउन्डर मिलान्डा सिरिवर्धनलाई पनि डेब्यू दिएको छ । मिलान्डाले स्पिन बलिङसँगै तल्लोक्रममा राम्रो ब्याटिङ गर्दछन् । उनले श्रीलंकाबाट पाँच टेस्ट, २७ ओडिआई र २२ टि२० आई खेल खेलेका छन् ।

जनकपुरको टोलीमा भने नेपालका आक्रामक फिनिसर मोहम्मद आदिल आलम बेन्चमा छन् । उनी पूर्णरुपमा फिट नभएपछि विश्राम दिएको छ । उनको स्थानमा राजेश पुलामी मगर खेलेका छन् । टोलीमा अन्य भने परिवर्तन छैन ।
जनकपुर ६ खेलमा ४ मा जित र २ मा हारसहित दोस्रो स्थानमा छ । फार वेस्ट युनाइटेड ५ खेलमा १ मा जित र ४ मा हारसहित पुछारमा छ ।