काठमाडौं (हाम्रो खेलकुद) – इंग्लिस ब्याटर एलेक्स ब्लेकको विष्फोटक ब्याटिङमा काठमाडौं नाइट्सले नेपाल टि२० लिगमा पोखरा एभेन्जर्सलाई १ सय ६५ रनको चुनौतीपूर्ण लक्ष्य दिएको छ ।

टियु क्रिकेट मैदानमा टस हारेर पहिला ब्याटिङ थालेको नाइट्सले निर्धारित २० ओभरमा ४ विकेट गुमाउँदै १ सय ६४ रन बनायो । काठमाडौंका एलेक्स ब्लेकले २८ बलमा ३ चौका र ७ छक्कासहित ६४ रनको विष्फोटक इनिङ खेले ।

एक समय काठमाडौं १६ ओभरमा ९३–२ को अवस्थामा थियो । एलेक्स ब्लेक ५ बलमा ३ रनमा अविजित थिए । ब्लेकले १७ औं ओभरमा तुलबहादुर थापालाई दुई छक्का हाने । १९ औं ओभरमा आरिफ शेखलाई चार छक्कासहित २७ रन बटुलेपछि विशाल योगफल बनाएको थियो ।

ब्लेकले २३ बलमै अर्धशतक प्रहार गरे । जुन यस प्रतियोगिता सर्वाधिक छिटो हो । यसअघि पोखराका कुशल मल्लले लुम्बिनी अल स्टार्सविरुद्ध २४ बलमा अर्धशतक हानेका थिए ।

पहिलो विकेटमा लागि विरनदीप सिंह र सुनम गौतमले १२.४ ओभरमा ७३ रनको साझेदारी गरेका थिए । कुशल मल्लको स्वलो बलमा विरनदीप ३८ बलमा २ चौका र १ छक्कासहित ३२ रनमा बोल्ड भए । सुनम ४२ बलमा ५ चौकासहित तुलबहादुरको बलमा क्याच आउट भए । एलेक्स ब्लेक अन्तिम ओभरको तेस्रो बलमा प्रतिश जि.सीको बलमा एलबीडब्लू आउट भए ।

तुलबहादुरले नै आजमतुल्लाह ओमरजाईलाई तीन रनमा बोल्ड गरे । सुरुवाती ९ ओभरमा ३८ रन मात्रै बनाएको थियो । १० औं ओभरमा जाहिर खानले १८ रन खर्चेपछि ५६-० को अवस्थामा थियो । अन्तिम १० ओभरमा ९८ रन जोड्यो । तुलबहादुर थापाले २ ओभरमा १७ रन खर्चेर २ विकेट लिए । कुशल मल्ल र प्रतिश जि.सीले एक एक विकेट लिए ।