काठमाडौं (हाम्रो खेलकुद) – इटहरीमा यसै महिना अन्तिमदेखि सुरु हुने प्रधानमन्त्री कप महिला राष्ट्रिय टि२० प्रतियोगिता विजेताले पाँच लाख पाउने भएका छन् । नेपाल क्रिकेट संघका अनुसार प्रतियोगिता विजेताले पाँच लाख र उपविजेता टोलीले तीन लाख रुपैयाँ प्राप्त गर्नेछन् ।

नेपालका ७ प्रदेश र विभागीय टोली नेपाल एपिएफ क्लब गरि कुल ८ टोलीबीच प्रतियोगिता हुनेछ । प्रतियोगितामा ८ टोलीलाई दुई समूहमा विभाजन गरिनेछ । हरेक समूहमा शीर्ष दुई टोलीले सेमिफाइनल खेल्नेछन् ।

प्रतियोगिता पुष २९ देखि प्रदेश एकको इटहरीमा रहेको जनता क्रिकेट पार्कमा हुनेछ । प्रतियोगिता सर्वोत्कृष्ट खेलाडीले ३० हजार, उत्कृष्ट ब्याटर र बलरले समान २० हजार पाउनेछन् । प्रतियोगिता प्रत्येक प्लेयर अफ द म्याचले तीन हजार प्राप्त गर्नेछन् ।

नेपाल पुलिस क्लबले भने प्रधानमन्त्री कप खेल्न नपाउने भएको छ । पहिला नै यस प्रतियोगिता बजेट आएको र तीन महिना अघि पुलिसले जानकारी नदिएपछि खेल्न नपाउने भएको हो । पुलिसले गत असोजमा घरेलु क्रिकेटमा डेब्यू गर्दै नवौं राष्ट्रिय खेलकुदमा स्वर्ण जितेको थियो ।

पुलिसले नेपाली घरेलु क्रिकेटमा एपिएफको एकछत्र राज तोडेको थियो । २०२० को प्रधानमन्त्री कपमा प्रदेश नम्बर एकले एपिएफलाई हराउँदै उपाधि जितेको थियो । अन्य प्रतियोगितामा भने एपिएफले उपाधि जित्दै आएको छ ।

यो पनि : पुलिसले महिला प्रधानमन्त्री कप खेल्न नपाउने