काठमाडौं (हाम्रो खेलकुद) – नेपाली क्रिकेट टोलीका विकेटकिपर ब्याटर अर्जुन साउदलाई विराटसुपर किंग्सले नेपाल टि२० लिगमा जनकपुर रोयल्सविरुद्ध बेन्चमा राखेको छ ।

टियु क्रिकेट मैदानमा भएको टसमा विराटनगरले टस जितेर पहिला फिल्डिङको निर्णय लिएको छ । विराटनगरले आजको खेलमा अर्जुन साउदलाई बेन्चमा राखेको छ । अर्जुनले ४ खेलमा ६२ बल खेल्दै ५३ रन बनाएका छन् । आज विराटनगरले अर्जुनको स्थानमा प्रदीप ऐरीलाई पहिलो खेल खेलाएको छ । प्रदीपले विकेटकिपरको भूमिका निर्वाह गर्नेछन् ।

पछिल्ला दुई खेलमा बेन्चमा रहेका सिकन्दर राजा भने घर फर्किएका छन् । राजाले २ खेलमा ५५ रन बनाउँदा एक विकेट लिएका छन् । राजाको स्थानमा नेटबलरको रुपमा आएका श्रीलंका तीव्र गतिका बलर सन्जिव कुमारस्वामीले मौका पाएका छन् । त्यस्तै रिजन ढकालको स्थानमा स्पिनर सूर्य तामाङलाई खेलाएको छ ।

जनकपुर रोयल्सका केस्रिक विलियम्स पनि वेस्टइन्डिज फर्किएका छन् । आफन्तको निधनपछि केस्रिक फर्किएको बुझिएको छ । जनकपुर ४ खेलमा ३ मा जित र १ मा हारसहित ६ अंकका साथ दोस्रो स्थानमा छ । विराटनगर ४ खेलमा २ मा जित र २ मा हारसहित चौथो स्थानमा छ ।

विराटनगरको प्लेइङ ११ : रोहित कुमार पौडेल, नन्दन यादव, साहब आलम, सूर्य तामाङ, प्रदीप ऐरी (विकेटकिपर), पृथु बास्कोटा, विवेक कुमार यादव, सन्जिव कुमारस्वामी, आन्द्रे म्याकार्थी, हुसेन तालत र गौरांशु शर्मा ।

जनकपुरको प्लेइङ ११ : सोमपाल कामी, सन्दीप जोरा, मोहम्मद आदिल आलम, ललितनारायण राजवंशी, पवन सरार्फ, जितेन्द्र मुखिया, खडक बोहरा, ट्रेभन ग्रिफिक, अशान प्रियान्जन, चाडविक वाल्टन र समिउल्लाह शिनवारी ।