काठमाडौं (हाम्रो खेलकुद) – आक्रामक ब्याटिङसँगै पोखरा एभेन्जर्सले नेपाल टि२० लिगमा पहिलो जित हात पारेको छ । लगातार पाँच खेलमा पराजित भएको पोखराले फार वेस्ट युनाइटेडमाथि तीन विकेटको कीर्तिमानी जित हात पार्दै प्लेअफको सम्भावना कायमै राखेको छ ।

जितको लागि १ सय ८८ रनको विजयी लक्ष्य पछ्याएको पोखराले १९.१ ओभरमा ७ विकेट गुमाउँदै पूरा गर्यो । नेपाल टि२० लिगमा यो सर्वाधिक ठूलो रन पूरा हो । यसअघि जनकपुर रोयल्सले फार वेस्ट विरुद्ध नै १ सय ७० रनको लक्ष्य पूरा गरेको थियो । पोखरा कुशल मल्लले २२ बलमा ५ छक्कासहित ४० रनमा आउट भए । आसिफ शेखले ३३ बलमा २ चौका र २ छक्कासहित ४५ रन जोडे ।

पोखरालाई ओपनर सुमित महर्जन र आसिफ शेखले ६.३ ओभरमा ६५ रनको साझेदारी गर्दै उत्कृष्ट सुरुवात दिलाएका थिए । सुमित २२ बलमा ५ चौका र २ छक्कासहित ३८ रनमा आउट भए । सुमित उमेर अलीको बलमा हरिशंकर शाहबाट क्याच आउट भएका थिए ।

थप १८ रन जोडेपछि कप्तान उपुल थरंगा ९ रनमा भुवन कार्कीको बलमा कट एण्ड बोल्ड आउट भए । तेस्रो विकेटका लागि कुशल मल्ल र आसिफ शेखले ५२ रनको साझेदारी गर्दै जितको आधार तय गरे । आसिफ शेख प्रकाश जैशीको १४ औं ओभरको तेस्रो बलमा लङअफमा करण केसीबाट क्याच आउट भएपछि दोस्रो अर्धशतक प्रहार गर्नबाट पाँच रनले चुकेका थिए ।

यसै ओभरको अन्तिम बलमा ठूलो सट खेलेपनि डिप मिडविकेटमा करण केसीले नै लामो दौडका साथ कुशलको उत्कृष्ट क्याच लिए । पाँचौं विकेटका लागि आमिर हाम्जा र सिद्धान्त लोहनीले ३६ रनको साझेदारी गरेका थिए । हाम्जा १२ रनमा क्याच आउट भए ।

पोखरालाई अन्तिम ६ बलमा जितको लागि ४ रन चाहिँएको थियो । प्रकाश जैशीलाई अभिमन्यु मिथुनले एक्स्ट्रा कभरमा चौका हान्दै खेल सकाए । मिथुन ८ र विपिन खत्री ६ रनमा अविजित रहे ।

सिद्धान्त लोहनी १० बलमा १ चौका र २ छक्कासहित २३ रनमा आउट भए । फार वेस्टका करण केसीले ४ ओभरमा ४२ रन खर्चेर २ विकेट लिए । उमेर अलीले ४ ओभरमा ३६ रन खर्चेर २ विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको युनाइटेडले निर्धारित २० ओभरमा ९ विकेट गुमाउँदै १ सय ८७ रन बनायो । फार वेस्टका लागि उमेर अलीले २६ बलमा ५ छक्कासहित सर्वाधिक ४२ रन बनाए । उमेर अली जाहिर खानको बलमा बोल्ड आउट भए । राशिद खानले १५ बलमा २ चौका र २ छक्कासहित ३२ रन जोडे ।

ओपनर देव खनाल ३१ बलमा ३ चौका र १ छक्कासहित ३३ रनमा आउट भए । अर्का ओपनर हासिम अन्सारी ७ बलमा २ चौका र १ छक्कासहित १७ रनमा कुशल मल्लको बलमा एलबीडब्लू आउट भए । भीम सार्की १७, विनोद भण्डारी ११ र हरिशंकर शाह ५ रनमा आउट भए । करण केसी ७ बलमा २ चौकासहित १२ रनमा अविजित रहे ।

पोखरा तीव्र गतिका बलर आमिर हाम्जाले ३ ओभरमा ४३ रन खर्चेर २ विकेट लिए । जाहिर खानले ४ ओभरमा २४ रन खर्चेर ३ विकेट लिए । डेब्यू खेल खेलेका तुलबहादुर थापाले ३ ओभरमा २२ रन खर्चेर २ विकेट लिए । आमिर हाम्जाले अन्तिम ओभरमा तीन नोबल सहित कुल १० बल गर्दै १८ रन खर्चेका थिए ।

पोखरा ६ खेलमा ५ मा हार र १ मा जितसहित २ अंकका साथ पुछारमा छ । पोखराले शनिबार लुम्बिनी अल स्टार्ससँग खेल्नेछ । पोखरा शीर्ष चारमा पर्दै प्लेअफ खेल्न सबै खेल जित्नु पर्ने हुन्छ ।

लुम्बिनी ५ खेलमा अपराजित रहँदै १० अंकका साथ शीर्ष स्थानमा छ । फार वेस्ट युनाइटेड ५ खेलमा ४ मा जित र १ मा हासहित पाँचौं छ । फार वेस्टले सोमबार जनकपुरसँग खेल्नेछ ।