काठमाडौं (हाम्रो खेलकुद) – नेपाली क्रिकेट टोलीका पूर्वकप्तान तथा काठमाडौं नाइट्सका कप्तान ज्ञानेन्द्र मल्लले नेपाल टि२० लिगमा समर्थकलाई मैदानमै आउन आग्रह गरेका छन् । नेपाल टि२० लिगमा यसअघि जस्तो दर्शक नआएपछि ज्ञानेन्द्रले उक्त आग्रह गरेका हुन् ।

‘समर्थक नआउँदा एकदमै खल्लो लाग्छ । किन आई रहेका छैनन् भन्दा पनि म आउन आग्रह गर्छु । हामीले एक अर्कालाई साथ नदिने हो भने क्रिकेट अघि बढ्दैन । जो जस्तो भएपनि नेपाल टि२० लिग भनेर आइसकेपछि हामीले साथ दिनुपर्छ’, ज्ञानेन्द्र मल्लले भने ।

‘चाहे त्यो सानो रकमबाट होस् वा उपस्थीतिले । त्यो देखाउनु पर्छ । जित्दा मात्रै होईन नेपाली क्रिकेटलाई कसैले यतिधेरै लगानी गरेको छ भने हामी सबैजनाको जिम्मेवारी हो की आएर उपस्थीति जनाउने । म चाहन्छु की अरु दिनमा काम भएपनि विदाको दिन पहिला हामीले जुन नम्बर देख्ने गर्दथ्यौं । वहाँहरु आउनु हुन्छ होला भन्ने आशा गर्छु’, ज्ञानेन्द्रले भने ।

नेपाल टि२० लिग शनिबार देखि सुरु भएको हो । शनिबार देखि सोमबार सम्म सम्म टिकट मूल्य तीन सय राखिएको थियो । मंगलबारदेखि टिकट मूल्य एक सय राखिएको थियो । त्यसमा पनि दर्शक नआएपछि बुधबार देखि प्रवेश निशुल्क गरिएको थियो । शुक्रबारबाट पुन एक सय रुपैयाँ राखिएको छ ।

काठमाडौं लुम्बिनी अल स्टार्ससँग ३५ रनले पराजित भयो । १ सय ५१ रनको विजयी लक्ष्य पछ्याएको काठमाडौं एक समय ५–४ को अवस्थामा पुगेको थियो । ज्ञानेन्द्रले योजनाअनुसार खेल्न नसकेको बताए ।

‘सुरुवातमा विकेट अस्ति भन्दा राम्रो भएको थियो । विहान पहिलो इनिङपछि पनि राम्रो नै हुन्छ । हामीले सदुपयोग गर्न सकेनौं । रन आउट देखि सबै मोमेन्टम एक पटक परिवर्तन भयो । हामीले सोचे जस्तो राम्रो गर्न सकेनौं’, उनले भने ।

यस प्रतियोगितामा नेपाली प्रमुख ब्याटरले नै अपेक्षा अनुसार प्रदर्शन गर्न सकेका छैनन् । विदेशी खेलाडीले भने लगातार म्याच विनिङ प्रदर्शन गर्दै आएका छन् । ज्ञानेन्द्र म्याच अभ्यासको कुरा बताउँछन् ।

‘म्याच प्राटिक्सको कुरा हो । विदेशी खेलाडी फरक वातावरणमा खेलि राखेको हुन्छ । कतिपयलाई दबाब भएको हुनसक्छ । हामी नेपाली खेलाडी खेल्नुपर्छ भनेर भनि राखेका हुन्छौं । हामी नेपाली खेलाडी सहयोगी भूमिकाबाट राम्रो आई रहेको पनि देख्दैनौं । हामीले अझ सहयोग गर्नुपर्छ । त्यो भने आत्माविश्वास पनि आउँछ’, ज्ञानेन्द्रले भने ।

त्यसैमा थपे, ‘विदेशी खेलाडीहरु आफ्नो खेल खेल्न आएको हुन्छ । उनीहरु बढी मज्जा पनि लिई रहेको हुन्छ । उनीहरुलाई धेरै दबाब पनि हुन्न । आफ्नो सट पनि खेल्छन् । विदेशी खेलाडीहरु पनि केहि सफल हुन सकेका छैनन् । प्रदर्शन गर्छ र अनुभव पाउँछौं भनेर नै हामी भन्दा माथिल्लो स्तरको विदेशी खेलाडी लिएर आएका हुन्छौं ।’

नेपाल टि२० लिगमा दर्शक : भित्र पस्नेभन्दा बाहिर बस्ने बढी

‘हामीले राम्रो क्रिकेट नखेल्दा समर्थक निराश हुनुहुन्छ ‘– रोहित