काठमाडौं (हाम्रो खेलकुद) – युवा ओपनर कन्चन श्रेष्ठको अर्धशतकका बाबजुद बागमती प्रदेश हङकङ महिला क्रिकेट क्लबसँग दोस्रो टि२० अभ्यास खेलमा एक रनले पराजित भएको छ । योसँगै दुई टि२० अभ्यास खेल हङकङ क्रिकेट क्लबले २–० ले जितेको थियो । दुई ४० ओभरको अभ्यास खेल भने बागमतीले २–० ले नै जितेको थियो ।

जितको लागि १ सय ४ रनको विजयी लक्ष्य पछ्याएको बागमती निर्धारित २० ओभरमा ६ विकेट गुमाउँदै १ सय २ रन बनायो । बागमतीकी कन्चन श्रेष्ठले ४८ बलमा ७ चौकासहित सर्वाधिक ५२ रनमा आउट भइन् । कन्चन यस सिरिजमा अर्धशतक प्रहार गर्ने एक्लो ब्याटर समेत हुन् ।

बागमतीलाई जितको लागि अन्तिम १८ बलमा ८ रन चाहिँएको थियो । तर उक्त रन बनाउन नसकेपछि एक रनले पराजित भएको हो । सोनी पाख्रिन ३९ बलमा १ चौकासहित २३ रन बनाइन् । अस्मिता खरेल र हेलिसा गुरुङले ७–७ रन बनाइन् । हङकङकी बेट्टी चानले ४ ओभरमा १८ रन खर्चेर २ विकेट लिइन् ।

त्यसअघि तल्लो मुलपानी क्रिकेट मैदानमा टस हारेर पहिला ब्याटिङ थालेको हङकङले निर्धारित २० ओभरमा ८ विकेट गुमाउँदै १ सय ३ रन बनायो । हङकङकी केरी चानले २६ बलमा ४ चौकासहित सर्वाधिक २६ रन बनाइन् ।

बागमतीकी सोनी पाख्रिनले सर्वाधिक दुई विकेट लिइन् । खुशी डंगोल, विपिशा शाही र अस्मिना कर्माचार्यले एक एक विकेट लिइन् । प्रतियोगितामा सानदार अलराउन्ड प्रदर्शन गरेकी सोनी पाख्रिन सिरिजको प्लेयर अफ द म्याच चुनिन् ।

सिरिजमा सर्वाधिक विकेट लिने सोनी नै बनिन् । सोनीले ४ विकेट लिएकी थिइन् । प्रदेश खेलकुद विकास परिषद्, बागमती प्रदेश, पल्सर क्रिकेट एक्सिलेन्स सेन्टर र बागमती प्रदेश क्रिकेट संघको संयुक्त आयोजनामा बागमती प्रदेश आमन्त्रण क्रिकेट श्रृंखला खेलेको हो ।