एजेन्सी – कुशल मल्लको आक्रामक ब्याटिङमा पोखरा एभेन्जर्सले नेपाल टि२० लिगमा विराटनगर सुपर किंग्सलाई १ सय ४० रनको मध्यम लक्ष्य दिएको छ । टियु क्रिकेट मैदानमा टस हारेर पहिला ब्याटिङको निम्तो पाएको पोखराले निर्धारित १९ ओभरमा ७ विकेट गुमाउँदै १ सय ३९ रन बनायो ।

खेल निर्धारित समय भन्दा केहि ढिलो सुरु हुँदा एक ओभर घटेको छ । पहिलो खेल लुम्बिनी अल स्टार्स र फार वेस्टबीचको खेल सुपर ओभरमा पुगेको थियो । पोखराका कुशल मल्लले १८ बलमा ३ चौका र ३ छक्कासहित सर्वाधिक ३८ रन बनाए ।

कुशलले यसअघिको खेलमा लुम्बिनी अल स्टार्ससँग ३१ बलमा ५ चौका र ५ छक्कासहित ६१ रन बनाएका थिए । कुशल तीव्र गतिका बलर हुसेन तालतको बलमा बोल्ड आउट भए ।

ओपनर सुमित महर्जन ९ बलमा २ चौकासहित १२ रनमा आउट भए । आसिफ शेख १२ बलमा १० रन बनाउँदै पेभेलिएन फर्के । कप्तान उपुल थरंगा २८ बलमा २ चौकासहित १९ रनमा आउट भए । यस खेलमा शरद भेषावकरको स्थानमा थरंगाले कप्तानी गरेका छन् ।

सिद्धान्त लोहनी १९ बलमा ३ छक्कासहित २६ रनमा बोल्ड भए । प्रतिश जि.सीले ४ बलमा १ छक्कासहित ११, आरिफ शेख ३, शरद भेषावकर ९ र अभिमन्यु मिथुनले एक रन बनाए । विराटनगरका हुसेन तालत र राज रोक्कीले दुई दुई विकेट लिए । नन्दन यादव, आन्द्रे म्याकार्थी र साहब आलमले एक एक विकेट लिए ।