काठमाडौं (हाम्रो खेलकुद) – लुम्बिनी अल स्टार्सले नेपाल टि२० लिगमा फार वेस्ट युनाइटेडलाई सुपर ओभरमा हराउँदै लगातार चौथो जित हात पारेको छ । लगातार चौथो जितका साथ लुम्बिनी शीर्ष स्थानमा कायमै छ ।

सुपर ओभरमा जितको लागि फार वेस्ट युनाइटेडले १९ रन बनाउनु पर्ने थियो । तर मात्रै १० रन बनायो । फार वेस्ट युनाइटेडको ब्याटिङमा कप्तान हश्मातुल्लाह शाहिदी र विनोद भण्डारी आएका थिए । पहिलो बलनै शाहिदीले डिप मिडविकेटमा छक्का हाने । तर त्यसपछि उत्कृष्ट पूनरागमनका साथ मात्रै पाँच रन खर्चिदै जित दिलाए ।

दोस्रो बल किशोरले डट राखे । तेस्रो बलमा एक रन दिए । चौथो बल किशोरले योर्कर फ्याँलेपछि अन्तिम दुई बलमा दुई छक्का चाहिँएको थियो । पाँचौं बलमा एक रन दिएपछि जित नजिक पुगेको थियो । अन्तिम बलमा एक रन लिएपछि लुम्बिनी सुपर ओभरमा विजयी भयो ।

सुपर ओभरमा लुम्बिनी अल स्टार्सको ब्याटिङ गर्न साड्ली भान स्केक्किक र लाहिरु मिलान्था आएका थिए । बलिङमा करण केसी आएका थिए । करणले पहिलो खेल मिलान्थालाई डट राखे । लगत्तै वाइड फ्याँले । दोस्रो बल पनि करणले डट राखे । करणले दुबै बल लाइनमा राखेका थिए ।

तेस्रो बल मिलान्थाले एक्स्ट्रा कभरमा छक्का हाने । लगत्तै तेस्रो बलमा डिप कभरमा छक्का हाने । देव खनालले फिल्डिङमा गल्ती गरेपछि तीन रन बटुलेको थियो । पाँचौं बल भीम सार्कीले डिप मिडविकेटमा सानदार फिल्डिङ गर्दै छक्का हनुबाट बचाएका थिए । दुई रन बटुलेपछि कुल १८ रन बनाएको थियो ।

लुम्बिनीलाई अन्तिम ६ बलमा पाँच रन चाहिँएको थियो । करण केसीले सानदार बलिङ गर्दै चार रन मात्रै दिएपछि खेल टाई भएको थियो । जितको लागि १ सय ३८ रनको विजयी लक्ष्य पछ्याएको लुम्बिनीले निर्धारित २० ओभरमा ९ विकेट गुमाउँदै १ सय ३७ रन बनाएपछि खेल टाई भएको थियो ।

मात्रै पाँच रन चाहिँदा करण केसीले पहिलो बलमै साड्ली भान स्केक्किकलाई मिड विकेटमा उमेर अलीबाट ७ रनमा क्याच गराएपछि खेलले नयाँ मोड लिएको थियो । अन्तिम विकेटको रुपमा सागर ढकाल क्रिजमा आएका थिए । दोस्रो बल वाइड भयो । सागरले स्ट्राइक लिएपछि चार बलमा तीन रन चाहिँएको थियो ।

तेस्रो बल डट राखेपछि तीन बलमा तीन चाहिँएको थियो । लाइनको बल चौथो पनि गुलशनले छुन सकेनन् । पाँचौं बल पनि डट भएपछि खेल निकै रोमान्चक बनेको थियो । अन्तिम ओभरमा दुई रन लिएपछि खेल सुपर ओभरमा धकेलिएको थियो ।

गुलशन झा २४ बलमा ३ चौका र १ छक्कासहित ३६ रनमा अविजित रहे । लुम्बिनीका लाहिरु मिलान्थाले २० बलमा २ चौका र ४ छक्कासहित ३४ रन बनाए । ओपनर सुनिल धमला र कुशल भुर्तेलले खाता खोल्न सकेनन् । दीपेन्द्रसिंह ऐरी ४, अनिल शाह ९ र हरम्रीत सिंह ३ रनमा आउट भए । तल्लोक्रमका ब्याटर विपुल शर्माले २७ बलमा १ चौका र २ छक्कासहित ३१ रनमा रन आउट भए ।
करण केसीले ४ ओभरमा २० रन खर्चेर २ विकेट लिए । शेर मल्लले २ ओभरमा २७ रन खर्चेर २ विकेट लिए । राशिद खान, उमेर अली, हस्मातुल्लाह शाहिदी र भुवन कार्कीले एक एक विकेट लिए ।

त्यसअघि टियु क्रिकेट मैदानमा टस हारेर पहिला ब्याटिङ थालेको युनाइटेडले निर्धारित २० ओभरमा ५ विकेट गुमाउँदै १ सय ३७ रन बनाएको छ । युनाइटेडका ओपनर देव खनाल ४२ बलमा ५ चौकासहित सर्वाधिक ४८ रनमा आउट भए । देव स्पिनर हरम्रीतसिंहको बलमा अघि बढेर सट खेल्नेक्रममा मिस भएपछि विकेटकिपर लाहिरु मिलान्थाबाट स्टम्पिङ आउट हुन पुगेका थिए ।

पहिलो खेल खेलेका ओपनर हासिम अन्सारी २३ बलमा ११ रन बनाउँदै सागर ढकालको बलमा एलबीडब्लू धरापमा परे । कप्तान हश्मातुल्लाह शाहिदी २९ बलमा ३ चौकासहित ३२ र भीम सार्की १० बलमा २ चौकासहित १५ रनमा आउट भए ।

तल्लोक्रमका विकेटकिपर विनोद भण्डारी ९ बलमा १ चौका र १ छक्कासहित ११ रनमा आउट भए । करण केसी ६ बलमा २ चौकासहित १२ रनमा अविजित रहे । लुम्बिनीका तीव्र गतिका बलर किशोर महतोले ३ ओभरमा ११ रन खर्चेर १ विकेट लिए । तीव्र गतिका बलर साड्ली भान स्केल्किकले ४ ओभरमा ३९ रन खर्चेर २ विकेट लिए । हरम्रीत सिंह र सागर ढकालले एक एक विकेट लिए ।