एजेन्सी – न्युजिल्यान्डले पहिलो टेस्ट खेलमा घरेलु टोली पाकिस्तानविरुद्ध गतिलो जवाफ फर्खाएको छ । दोस्रो दिनको खेल सकिँदा न्युजिल्यान्डले पहिलो इनिङमा ४७ ओरमा कुनै विकेट नगुमाई १ सय ६५ रन बनाएको छ ।

न्युजिल्यान्डका ओपनर टम लाथम १ सय २६ बलमा ८ चौकासहित ७८ रनमा क्रिजमा छन् । डेभन कन्वे १ सय ५६ बलमा १२ चौकासहित ८२ रनमा अविजित छन् । समग्रमा न्युजिल्यान्ड अझै २ सय ७३ रनले पछि छ ।

त्यसअघि कराँचीमा टस जितेर ब्याटिङ रोजेको पाकिस्तान पहिलो इनिङमा ४ सय ३८ रनमा अल आउट भयो । पाकिस्तानका कप्तान बाबर आजम २ सय ८० बलमा १५ चौका र १ छक्कासहित सर्वाधिक १ सय ६१ रनमा आउट भए ।

दोस्रो दिन बाबर आजमले मात्रै तीन बल खेलेका थिए । बाबरको यो टेस्ट करिअरको नवौं शतक हो । अघा सलमानले १ सय ५५ बलमा १७ चौकासहित १ सय ३ रनको शतकीय इनिङ खेले । उनको टेस्ट करिअरको पहिलो शतक हो ।

२०१९ पछि पहिलो पटक टेस्ट क्रिकेटमा पूनरागमन गरेका पूर्वकप्तान तथा विकेटकिपर शरफराज अहमद १ सय ५३ बलमा ९ चौकासहित ८६ रनमा आउट भए ।

पाँचौं विकेटका लागि बाबर आजम र शरफराज अहमदले १ सय ९६ रनको सानदार शतकीय साझेदारी गर्दै विशाल योगफलको आधार तय गरेका थिए ।

पहिलो दिन अन्तिम समयमा स्पिनर अजाज पटेलको बलमा शरफराज डर्याल मिचेलबाट क्याच आउट भएका थिए । साउद सकिल २२ र इमाम उल हक २४ रनमा आउट भए । न्युजिल्यान्डका टिम साउथीले सर्वाधिक तीन विकेट लिए । अजाज पटेल, ईश सोधी र माइकल ब्रेसवेलले दुई दुई विकेट लिए ।