काठमाडौं (हाम्रो खेलकुद) – उत्कृष्ट ब्याटिङसँगै काठमाडौं नाइट्सले नेपाल टि२० लिगमा जनकपुर रोयल्समाथि ५३ रनको सहज जित हात पारेको छ । दोस्रो जितसँगै काठमाडौं अंक तालिकामा दोस्रो स्थानमा उक्लिएको छ ।

जितको लागि २ सय ९ रनको विशाल विजयी लक्ष्य पछ्याएको रोयल्सले निर्धारित २० ओभरमा १ सय ५५ रनमा अल आउट भयो । रोयल्सका सामिउल्लाह शिनवारीले २७ बलमा २ चौका र १ छक्कासहित २९ रनमा आउट भए ।

सन्दीप जोरा १२ बलमा १ चौका र २ छक्कासहित २६ रनमा रयान बर्लबाट उत्कृष्ट क्याच आउट भए । स्पिनर बसिर अहमदको बलमा चोभार एन्डतर्फ ठूलो सट खेलेपनि लङअफमा बर्लले विश्वस्तरिय क्याच लिए ।

पहिला बल समाएपनि बाउन्ड्री नजिकै हुँदा त्यो बल पुन माथि फाल्दै छक्का हुनबाट बचाए । पछि पुन भित्र आउँदै क्याच लिएपछि लयमा देखिएका जोरा पेभेलिएन फर्किनु परेको थियो ।

ओपनर पवन सरार्फ १८ बलमा ५ चौकासहित २४, चाडविक वाल्टन ९, शराफुद्दिन अशरफ १९ र आदिल आलम १६ रनमा आउट भए । अभिनाश बोहराको बलमा बोल्ड हुनुअघि आदिलले ९ बलमा १ चौका र १ छक्का हाने । राजेश पुलामी ७, सोमपाल कामी ६ र जितेन्द्र मुखिया १३ रनमा आउट भए ।

नाइट्सका आजमतुल्लाह ओमरजाईले ४ ओभरमा २५ रन खर्चेर ३ विकेट लिए । बसिर अहमदले ४ ओभरमा २७ रन खर्चेर २ विकेट लिए । अभिनाश बोहरा, कमलसिंह ऐरी, अनिल खरेल र सुनाम गौतमले एक एक विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको काठमाडौंले निर्धारित २० ओभरमा ६ विकेट गुमाउँदै २ सय ८ रन बनाएको थियो । काठमाडौंका एलेक्स ब्लेकले ४३ बलमा ४ चौका र ७ छक्कासहित सर्वाधिक सर्वाधिक ८३ रन बनाए ।

ब्लेक जितेन्द्र मुखियाको अन्तिम ओभरको दोस्रो बलमा लङअफमा सन्दीप जोराबाट क्याच आउट भए । ओपनर विरनदीप सिंह ३४ बलमा ७ चौका र १ छक्कासहित ४९ रनमा आउट भए ।

विरनदीप सिंह स्पिनर पवन सरार्फको बलमा एलबीडब्लू आउट भएपछि अर्धशतक बनाउन मात्रै एक रनले चुकेका थिए । लोकेश बम ८ बलमा २ चौका र १ छक्कासहित १५ रनमा बोल्ड भए । लोकेश सराफुद्दिन अशरफको बलमा बोल्ड भएका थिए ।
पवन सरार्फले नै रयान बर्लको स्थानमा एलबीडब्लू आउट गरे ।

मोहम्मद आदिलको बलमा ज्ञानेन्द्र मल्ल कभरमा टे«भन ग्रिफिकबाट दुई रनमा उत्कृष्ट क्याच आउट भए । दोस्रो विकेटका लागि विरनदीप र ब्लेकले ६२ रनको साझेदारी गरे । तल्लोक्रमका आजमतुल्लाह ओमरजाई १५ बलमा १ चौका र ४ छक्कासहित ४३ रनमा अविजित रहे । नेपाल टि२० लिगमा २ सय माथि रन बनाउने पहिलो टोली काठमाडौं बन्यो ।

जनकपुरका पवन सरार्फले ४ ओभरमा १८ रन खर्चेर २ विकेट लिए । सोमपाल कामी, जितेन्द्र मुखिया, सराफुद्धिन अशरफ र मोहम्मद आदिल आलमले एक एक विकेट लिए ।

काठमाडौं पहिलो खेलमा पोखराविरुद्ध २६ रनले विजयी भएको थियो । दोस्रो खेलमा फार वेस्ट युनाइटेडसँग चार विकेटले पराजित भएको थियो । काठमाडौं शुक्रबार लुम्बिनी अलस्टार्ससँग खेल्नेछ । जनकपुरले पोखरा र विराटनगरलाई समान पाँच विकेटले हराएको थियो । लुम्बिनीले बिहीबार फारवेस्टसँग खेल्नेछ ।

६ फ्रेन्चाइज टोली प्रतियोगितामा लुम्बिनी ३ खेलमा ६ अंकका साथ शीर्ष स्थानमा छ । काठमाडौं ३ खेलमा ४ अंकका साथ दोस्रो स्थानमा छ । जनकपुर ३ खेलमा २ मा जितका साथ ४ अंक भएपनि नेटरनरेटको कारण तेस्रो स्थानमा छ । दुई खेलमा २ अंकका साथ फार वेस्ट दोस्रो, विराटनगर सुपर किंग्स र पोखरा अंक विहीन हुँदै पुछारमा छ ।