काठमाडौं (हाम्रो खेलकुद) – दक्षिण अफ्रिकी अलराउन्डर श्याड्ली भान स्खेलक्विक अन्तिम बलमा छक्का हानेसँगै लुम्बिनी अल स्टार्सले नेपाल टि२० लिगमा पोखरा एभेन्जर्समाथि तीन विकेटको रोमान्चक जित हात पारेको छ । लुम्बिनीको यो लगातार तेस्रो जित हो । पोखराको लगातार तेस्रो हार हो ।

जितको लागि १ सय ३४ रनको विजयी लक्ष्य पछ्याएको लुम्बिनीले २० ओभरमा ७ विकेट गुमाउँदै पूरा गर्यो । अन्तिम बलमा जितको लागि पाँच रन चाहिँदा स्खेलक्विकले प्रतिश जि.सीलाई लङअफमा छक्का हान्दै रोमान्चक जित दिलाए । लुम्बिनीको जितमा अलराउन्ड प्रदर्शन गरेका शाड्ली भान स्खेलक्विक ११ बलमा ४ छक्कासहित ३१ रन बनाए ।

लुम्बिनीलाई जितको लागि अन्तिम ६ बलमा ८ रन चाहिँएको थियो । प्रतिश जि.सीले सुरुवाती पाँच बल भने सानदार गरे । प्रतिश जि.सीले पहिलो बलमै अनिल शाहलाई डिप कभरमा आमिर हम्जाबाट १९ रनमा क्याच आउट गराए ।

दोस्रो बल प्रतिशले डट राखे । तेस्रो बल प्रतिशले योर्कर फ्ँयाल्दै पुन डट राखे । चौथो बलमा एक रन दिएपछि दुई बलमा सात रन चाहिँएको थियो । शड्ली भानले लङअफमा दुई रन बटुले । अन्तिम बलमा लङअफमा छक्का हान्दै रोमान्चक जित दिलाए ।

लुम्बिनीका कुशल भुर्तेलले २८ बलमा ४ चौका र २ छक्कासहित सर्वाधिक सर्वाधिक ३८ रन बनाए । कुशल विपिन खत्रीको बलमा एलबीडब्लू आउट भए । ओपनर उन्मुक्त चन्द ३४ बलमा १ चौकासहित २२ रनमा आउट भए । कुशल मल्लको बलमा ठूलो सट खेलेका चन्द कभरमा मिथुनबाट क्याच आउट भए ।

लुम्बिनीलाई जितको लागि अन्तिम १२ बलमा २३ रन चाहिँएको थियो । १९ औं ओभरको चौथो र पाँचौं बलमा शड्ली भानले अभिमन्यु मिथुनलाई दुई छक्का हान्दै १५ रन खर्चिए । गुलशन झा १० रनमा आउट भए ।

पोखराका विपिन खत्रीले ३ ओभरमा २२ रन खर्चेर २ विकेट लिए । कुशल मल्लले २ ओभरमा ८ रन खर्चेर २ विकेट लिए । प्रतिश जि.सीले ४ ओभरमा २५ रन खर्चेर १ विकेट लिए । अभिमन्यु मिथुन र जाहिर खानले एक एक विकेट लिए ।

त्यसअघि टियु क्रिकेट मैदानमा टस हारेर पहिला ब्याटिङ थालेको पोखराले निर्धारित २० ओभरमा ९ विकेट गुमाउँदै १ सय ३३ रन बनाएको थियो । पोखरा कुशल मल्लले ३१ बलमा ५ चौका र ५ छक्कासहित सर्वाधिक ६१ रनको विष्फोटक इनिङ खेले ।

सुरुवाती १० ओभरमा मात्रै २७ रन जोडेको पोखरालाई खेलमा फर्काउन कुशल मल्लले विष्फोटक ब्याटिङ गरे । पोखराले अन्तिम १० ओभरमा १ सय ६ रन बनाएको थियो । लामो समयपछि कुशलले आफ्नो शैलीमा प्रस्तुत भए । कुशलले १७ औं ओभरको पहिलो बलमा स्पिनर सागर ढकाललाई स्टेटमा सानदार छक्का हान्दै मात्रै २४ बलमा अर्धशतक पूरा गरेका थिए ।

उपुल थरंगाले ५१ बलमा २ चौका र १ छक्कासहित ४२ रनमा आउट भए । थरंगा एक समय ३६ बलमा मात्रै १६ रन बनाएका थिए । कुशलसँगको साझेदारीले स्ट्राइकरेट परिवर्तन गरे । तेस्रो विकेटका लागि कुशल र थरंगाले ९६ रनको महत्वपूर्ण साझेदारी गरे ।

अन्तिम समयतिर ठूलो सटको चक्करमा पोखराले पाँच रन जोड्न पाँच विकेट गुमाएको थियो । थरंगा र कुशलपछिका ब्याटरको प्रदर्शन भने सम्झन लायक रहेन । अभिमन्यु मिथुन, सिद्धान्त लोहनी र प्रतिश जि।सीले खाता खोल्न सकेनन् । शरद भेषावकर ५, आरिफ शेख २ र विपिन खत्रीले ९ रन बनाए ।

नेपाली क्रिकेट टोलीका ओपनर समेत रहेका आसिफ शेख १८ बलमा ६ रन बनाउँदै आउट भएका छन् । आसिफ स्पिनर सागर ढकालको बलमा लङअनमा अनिल शाहबाट क्याच आउट भएका थिए ।

पहिलो खेल खेलका तीव्र गतिका बलर शड्ली भान सेक्किकले ४ ओभरमा २७ रन खर्चेर ३ विकेट लिए । किशोर महतोले ४ ओभरमा १ मेडनसहित २० रन खर्चेर २ विकेट लिए । गुलशन झाले ३ ओभरमा ४२ रन खर्चेर २ विकेट लिए । हरमीत सिंह र सागर ढकालले एक एक विकेट लिए ।

लुम्बिनीले पहिलो खेलमा फार वेस्ट युनाइटेडलाई ६७ रन र दोस्रो खेलमा विराटनगर सुपर किंग्सलाई तीन रनले हराएको थियो । लुम्बिनीले चौथो खेलमा बुधबार फार वेस्ट युनाइटेडसँग खेल्नेछ । पोखरा काठमाडौं नाइट्ससँग २६ रन र जनकपुर रोयल्ससँग पाँच विकेटले पराजित भएको थियो । पोखराले विहीबार विराटनगरसँग खेल्नेछ ।