काठमाडौं (हाम्रो खेलकुद) – बायाँ हाते स्पिनर ललितनारायण राजवंशी नेपाल टि२० लिगमा प्लेयर अफ द म्याच जित्ने पहिलो नेपाली खेलाडी बनेका छन् । जनकपुर रोयल्सका ललितले विराटनगर सुपर किंग्सविरुद्ध ४ ओभरमा १ मेडनसहित मात्रै ८ रन खर्चेर ५ विकेट लिए ।

ललितको उत्कृष्ट प्रदर्शनको सहयोगमा जनकपुरले विराटनगरलाई पाँच विकेटले हरायो । नेपाल टि२० लिगमा पाँच विकेट लिने ललित पहिलो खेलाडी समेत हुन् । चाडविक वाल्टनले ५५ बलमा ५ चौका र ४ छक्कासहित ६९ रन बनाए । जसक्रममा अन्तिम ओभरमा १६ रन पूरा गर्दै रोमान्चक जित दिलाएका थिए ।

खेलको प्लेयर अफ द म्याच भने ललित चुनिए । यसअघिका पाँचैं खेलमा विदेशी खेलाडी प्लेयर अफ द म्याच चुनिएका थिए । काठमाडौं र पोखराबीचको पहिलो खेलमा आजमतुल्लाह ओमरजाई प्लेयर अफ द म्याच बनेका थिए । लुम्बिनी अल स्टार्सले फार वेस्ट युनाइटेड र विराटनगर वारियर्सलाई हराउँदा दुवै खेलमा अर्धशतक प्रहार गरेका लाहिरु मिलान्था प्लेयर अफ द म्याच चुनिएका थिए ।

जनकपुरले पोखरालाई पाँच विकेटले हराउँदा केस्रिक विलियम्स, फार वेस्ट युनाइटेडले काठमाडौंलाई चार विकेटले हराउँदा हशमतुल्लाह शाहिदीले प्लेयर अफ द म्याच जितेका थिए ।

लुम्बिनी दुई खेलमा ४ अंकका साथ शीर्ष स्थानमा छ । जनकपुर रोयल्स २ खेलमा ४ अंकका साथ दोस्रो स्थानमा छ । मंगलबार पहिलो खेलमा पोखरा र लुम्बिनीबीच प्रतिस्पर्धा हुनेछ । दोस्रो खेलमा काठमाडौंले जनकपुरसँग खेल्नेछ ।

यो पनि : ललितको नेपाल टि२० लिगकै उत्कृष्ट बलिङ

ललित र वाल्टनको उत्कृष्ट प्रदर्शनमा जनकपुरको रोमान्चक जित