काठमाडौं (हाम्रो खेलकुद) – बायाँ हाते स्पिनर ललित नारायण राजवंशीको घातक बलिङमा विराटनगर सुपर किंग्सले नेपाल टि२० लिगमा जनकपुर रोयल्सलाई १ सय ४१ रनको मध्यम लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ थालेको विराटनगर १९.४ ओभरमा १ सय ४० रनमा अल आउट भयो । विराटनगरका सिकन्दर राजाले १८ बलमा २ चौका र ४ छक्कासहित सर्वाधिक ३८ रन बनाए । राजा ललितको बलमा ठूलो सट खेल्ने धुनमा राजेश पुलामी मगरबाट आउट भए ।

ओपनर अर्जुन साउद २१ बलमा २ चौका र १ छक्कासहित १८ रनमा आउट भए । गौरांशु शर्मा गोल्डेन डक भए । उपकप्तान रोहित पौडेल २९ बलमा ३ चौका र १ छक्कासहित ३२ रनमा क्याच आउट भए । रोहित मोहम्मद आदिलको बलमा विकेटकिपर चाडविक वाल्टनबाट क्याच आउट भए ।

१५ औं ओभरमा ललितले डबल विकेट मेडन राखे । १५ औं ओभरको चौथो बलमा आन्द्रे म्याकार्थीलाई एक रनमा बोल्ड गरे । लगत्तै अर्को बलमा पृथु बास्कटोबाट शून्यमा सन्दीप जोराबाट क्याच आउट भए । १७ औं ओभरमा ललितले दुई विकेट लिँदै नेपाल टि२० लिगमा पाँच विकेट लिने पहिलो बलर बने ।

हुसेन तालत तेस्रो बलमा पवन सरार्फबाट २८ रनमा क्याच आउट भए । तालतले २१ बलमा ४ चौका हाने । एक बलपछि नन्दन यादव शून्यमै कट एण्ड बोल्ड आउट भए । विवेक यादव १० रनमा आउट भए ।

जनकपुरका ललित नारायण राजवंशीले ४ ओभरमा १ मेडनसहित ८ रन खर्चेर ५ विकेट लिए । ललित बाहेक अन्य कुनैपनि खेलाडीले तीन भन्दामाथि एक खेलमा विकेट लिन सकेका छैनन् ।

मोहम्मद आदिल आलमले ४ ओभरमा २८ रन खर्चेर २ विकेट लिए । केस्रिक विलियम्स ३ ओभरमा २६ रन खर्चेर २ विकेट लिए । सोमपाल कामीले २.५ ओभरमा ११ रन खर्चेर १ विकेट लिए ।