काठमाडौं (हाम्रो खेलकुद) – भारतीय यू–१९ विश्वकप विजेता कप्तान उन्मुक्त चन्द्र नेपाल टि२० लिगमा दोस्रो खेलमा पनि सुरुवातमै आउट भएका छन् ।

लुम्बिनी अल स्टार्सका ओपनर उन्मुक्त विराटनगर सुपर किंग्सविरुद्ध दोस्रो ओभरको पाँचौं बलमा टप एज लागेर दुई रनमै आउट भएका छन् । पाकिस्तानका तीव्र गतिका बलर हुसन तालतको दोस्रो ओभरको पाँचौं बलमा उन्मुक्त टप एज लागेर विकेटकिपर विकेटकिपर अर्जुन साउदबाट क्याच आउट भए ।

हुसन तालतले पाकिस्तानबाट १ ओडिआई र १८ टि२० आई खेल खेलेका छन् । उनी तीव्र गतिसँगै शीर्षक्रममा राम्रो ब्याटिङ गर्नेगर्दछन् । पहिलो खेलमा उन्मुक्त चन्द फार वेस्ट युनाइटेडविरुद्ध २ रनमा क्याच आउट भएका थिए । उनी करण केसीको बलमा विकेटकिपर विनोद भण्डारीबाट क्याच आउट भएका थिए ।

भारतीय सिनियर टोलीमा लामो समय प्रतिक्षा गरिरहँदा पनि मौका नपाएपछि चन्दले गत वर्ष सन्न्यासको घोषणा गर्दै अमेरिका लागेका थिए । एक समय चन्दलाई भारतीय क्रिकेटको ब्याटिङको भविष्य मानिन्थ्यो । तर भारतीय क्रिकेटमा तीव्र प्रतिस्पर्धामा उनले आफ्नो स्थान बनाउन सकेनन् ।

चन्दको कप्तानीमा भारतले सन् २०१२ मा यू-१९ विश्वकप जितेको थियो । त्यसअघि २००८ मा विराट कोहलीको कप्तानीमा भारतले फाइनलमा दक्षिण अफ्रिकालाई डकवर्थ लेविस पद्धतिको आधारमा १२ रनले हराउँदै यू१९ विश्वकप जितेको थियो । भारतीय क्रिकेट टोलीमा विराट कोहलीले लगातार सानदार प्रदर्शन गरेपछि चन्दले टोलीमा स्थान बनाउन सकेका थिएनन् ।

चन्दले फाइनलमा अष्ट्रेलियालाई ६ विकेटले हराउँदै भारतलाई उपाधि जिताउँदा १ सय ३० बलमा ७ चौका र ६ छक्का सहित कुल १ सय ११ रनको उत्कृष्ट शतकीय इनिङ खेलेका थिए । अमेरिकाबाट क्रिकेट खेल्ने तयारीमा छन् ।

उनले आइपिएल दिल्ली क्यापिटल्स, मुम्बई इन्डियन्स र राजस्थान रोयल्सबाट खेलेका छन् । सुरुवाती समय दिल्लीबाट घरेलु क्रिकेट खेलेका उनले त्यहाँ राम्रो मौका नपाएपछि पछिल्लो समय उत्तरखण्डबाट खेलेका थिए । चन्दले ७७ प्रथम श्रेणी, १ सय २० लिष्ट ए र ७७ टि२० आई खेलेका छन् ।