काठमाडौं (हाम्रो खेलकुद) – गुलशन झाको आक्रामक अन्त्यमा उपाधि दाबेदार लुम्बिनी अल स्टार्सले नेपाल टि२० लिगको पहिलो खेलमा फार वेस्ट युनाइटेडलाई १ सय ५३ रनको मध्यम लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ रोजेको लुम्बिनीले निर्धारित २० ओभरमा ७ विकेट गुमाउँदै १ सय ५२ रन बनायो । लुम्बिनीको लागि ओपनर लाहिरु मिलान्थाले ५० बलमा ८ चौका र १ छक्कासहित सर्वाधिक ६० रनको योगदान दिए ।

गुलशन झाले १० बलमा ३ छक्कासहित २५ रनमा रन आउट भए । अन्तिम ओभरमा अन्तिम बलमा बल पाएका गुलशन रन आउट भएका थिए । अन्तिम ओभरमा एक रन आउट सहित करण केसीले मात्रै ६ रन खर्चिए कुल तीन विकेट लिए ।

प्रमुख ब्याटर तथा ओपनर उन्मुक्त चन्द दोस्रो ओभरमै आउट हुन पुगे । टियु एन्डबाट आएका करण केसीले दोस्रो ओभरको अन्तिम बलमा उन्मुक्त चन्दलाई विकेटकिपर विनोद भण्डारीबाट दुई रनमा गराए । चन्दले सात बल खेल्दा उनले कुनैपनि बाउन्ड्री प्रहार गर्न सकेनन् ।

कुशल भुर्तेल उमेर अलीको बलमा सात रनमा शेर मल्लबाट क्याच आउट भए । तेस्रो विकेटका लागि दीपेन्द्रसिंह ऐरी र लाहिरु मिलान्थाले ७२ बलमा ८४ रनको साझेदारी गर्दै इनिङ उकासेका थिए ।

कप्तान दीपेन्द्रसिंह ऐरी ३५ रनमा उमेर अलीको बलमा एलबीडब्लू आउट भए । दीपेन्द्रले ३८ बलमा २ चौका र १ छक्का प्रहार गरे । विपुल शर्मा ७ बलमा २ चौकासहित १२ रनमा आउट भए ।

फार वेस्ट युनाइटेडका उमेर अलीले ४ ओभरमा ३० रन खर्चेर ३ विकेट लिए । करण केसीले ४ ओभरमा ३३ रन खर्चेर ३ विकेट लिए ।