काठमाडौं (हाम्रो खेलकुद) – नेपाल क्रिकेट संघ (क्यान) ले आयोजना गर्ने नेपाल टि२० लिग शनिबार देखि सुरु हुने भएको छ । क्यानले एक प्रेस विज्ञप्ति जारी गर्दै प्राविधिक कारणले एकदिन पछि सरेको जनाएको छ ।

त्यस्तै क्यानले प्रतियोगिता निर्देशकमा क्यानका महाप्रबन्धक वृतान्त खनाललाई नियुक्त गरेको जनाएको छ । नेपाल टि२० लिग यो तेस्रो पटक सरेको हो । प्रतियोगिता पुष ८ देखि २६ सम्म हुने बताइएको थियो ।

‘प्रतियोगिता एकदिन पछि सरेको छ । तालिका अनुसार पहिलो दिनको खेलबाट सुरु गर्ने कि । त्यो खेललाई अन्तिममा गरेर तालिका अनुसार नै नियमित गर्ने भन्ने छलफल भई सकेको छ’, क्यानका अध्यक्ष चतुरबहादुर चन्दले भने । खेल ढिलाई विदेशी खेलाडीको श्रम स्वीकृतिको कारण भएको हो । चन्द सबै प्रक्रिया सकेको हुँदा श्रम स्वीकृति आउने बताए ।

असोज ८ देखि गर्ने मिति तोकिएपनि अन्तिम समयमा निर्वाचन र सुरक्षाको कारण असोज सम्म सारेको थियो । दोस्रो पटक सर्दा प्रतियोगिता मंसिर २६ देखि पुष १६ हुने बताइएको थियो ।

प्रतियोगितामा काठमाडौं नाइट्स, पोखरा एभेन्जर्स, विराटनगर सुपर किंग्स, लुम्बिनी अल स्टार्स, जनकपुर रोयल्स र फार वेस्टर्न युनाइटेड छन् । क्यानले विना खुल्ला प्रतिस्पर्धा विना सेभेन थ्री स्पोर्ट्सलाई नेपाल टि२० लिग आयोजना अधिकार ८ वर्षका लागि ३३ करोडमा बेचेको थियो ।

यो पढ्नुहोस् : नेपाल टि२० लिग : सुनसान तयारी, सम्पर्कविहीन क्यान!