काठमाडौं (हाम्रो खेलकुद) – नेपाल क्रिकेट संघ(क्यान) ले आयोजना गर्ने नेपाल टि२० लिग फेरि सर्ने भएको छ । क्यानले विदेशी खेलाडीको श्रम स्वीकृतिलाई देखाउँदै शुक्रबारबाट सुरु हुन नसक्ने जनाएको छ ।

क्यानका अध्यक्ष चतुरबहादुर चन्दले शुक्रबारदेखि सुरु नहुने बताए । क्यानको यस विषयमा बिहीबार विहान देखिनै बैठक बसेको थियो । तर कहिलेदेखि सुरु हुने भने अनिश्चित छ ।

‘नेपाल टि२० लिग एक दुई तलमाथि हुन्छ । शुक्रबारबाट हुँदैन । विदेशी खेलाडीको कागजी प्रक्रिया कारण रोकिएको हो । श्रम स्वीकृतिको प्रक्रिया अघि बढेको छ । श्रम स्वीकृति लिने खास काम फ्रेन्चाइज टोलीको हो’, चन्दले हाम्रो खेलकुदसँग भने ।

‘विदेशी खेलाडी को आउने को नआउने भन्ने भयो । श्रम स्वीकृति अघि बढेपछि सबै कुरा हुनुपर्ने हो । संसारभर खेलाडीहरुलाई श्रम स्वीकृति लिन नपर्ने रहेछ । कानुन छ पनि छैन पनि । त्यस्तो हामीलाई लागेन । श्रम स्वीकृति लिएका छौं । मुद्दा हालेको छ । उनीहरुले श्रम स्वीकृति नगरेको हुँदा समयमै हुन नसक्ने भएको हो’, चन्दले भने ।

यदि एक दुई दिनको समयमा हुन नसके कर्मसियल तथा आयोजना जिम्मा लिएको सेभेन थ्री स्पोर्ट्ससँग सम्झौतानै रद्द गर्ने चन्दले बताए । एक दुई दिनमा नभए प्रतियोगितानै नहुने समेत स्पष्ट पारे ।

‘एक दुई दिन ढिलो भएरै छलफल गरेका छौं । यो सिजन सर्यो भने सेभेन थ्री कम्पनीसँग कुनैपनि काम हुँदैन । हामी तयार छौं । मैदान तयार छ । हाम्रा अफिसियलहरु तयार छन् । नेपाली खेलाडी दिएका छौं । विदेशी खेलाडी पनि आई सकेका छन्’, चन्दले भने ।

नेपाल टि२० लिग यो तेस्रो पटक सरेको हो । असोज ८ देखि गर्ने मिति तोकिएपनि अन्तिम समयमा निर्वाचन र सुरक्षाको कारण असोज सम्म सारेको थियो । दोस्रो पटक सर्दा प्रतियोगिता मंसिर २६ देखि पुष १६ हुने बताइएको थियो । प्रतियोगिता पुष ८ देखि २६ सम्म हुने बताइएको थियो ।

प्रतियोगितामा काठमाडौं नाइट्स, पोखरा एभेन्जर्स, विराटनगर सुपर किंग्स, लुम्बिनी अल स्टार्स, जनकपुर रोयल्स र फार वेस्टर्न युनाइटेड छन् । क्यानले विना खुल्ला प्रतिस्पर्धा विना सेभेन थ्री स्पोर्ट्सलाई नेपाल टि२० लिग आयोजना अधिकार ८ वर्षका लागि ३३ करोडमा बेचेको थियो ।

यो पनि पढ्नुहोस्ः नेपाल टि२० लिग : सुनसान तयारी, सम्पर्कविहीन क्यान!