एजेन्सी – इन्डियन प्रिमियर लिग (आइपिएल) २०२३ को मिनी अक्सनमा अफगानिस्तानका १५ वर्षीय स्पिनर अल्लाह मोहम्मद गजान्फर रहेका छन् । आइपिएल २०२३ को मिनी अक्सनमा नाम दिने अल्लाह सबैभन्दा कान्छा खेलाडी हुन् ।

२३ डिसेम्बरमा कोचीमा हुने अक्सनमा कुल ४ सय ५ क्रिकेट छन् । कुल ९ सय ९१ खेलाडीले नाम दर्ता गराएपनि आइपिएलले सर्ट लिष्टमा ३ सय ६९ खेलाडी राखेको थियो । पछि फ्रेन्चाइज टोलीको आग्रहमा ३६ खेलाडी थपेको थियो । जसमध्य अफगानिस्तानका १५ वर्षीय अल्लाह सबैभन्दा कान्छा खेलाडी रहेका छन् ।

दायाँ हाते स्पिनर अल्लाहले न्यूनतम २० लाख भारुमा आफ्नो नाम दर्ता गराएका छन् । बिग ब्यास लिगको ड्राफ्टमा नाम दिएपनि उनी छनोट हुन सकेका थिएनन् । अल्लाह नेपाल टि२० लिगमा करण केर्सी मार्की खेलाडी रहेको फ्रेन्चाइज टोली फार वेस्टर्न युनाइटेडमा पनि आवद्ध छन् । पाकिस्तान क्रिकेट बोर्डले केहि महिना अघि आयोजना गरेको पाकिस्तान जुनियर लिग पनि खेलेका थिए ।

त्यस्तै भारतीय क्रिकेटर अमित मिश्रा यस आइपिएल अक्सनका सर्वाधिक उमेर भएका खेलाडीको रुपमा छन् । ४० वर्षीय मिश्राले ५० लाख भारुमा आफ्नो नाम दिएका छन् । मिश्राले आइपिएलमा १ सय ५४ खेल खेल्दै १ सय ६६ विकेट लिएका छन् । मिश्रा गत वर्ष आइपिएल अक्सनमा १ करोड ५० लाख न्यूनतम मूल्य राखेपछि अन्सोल्ड भएका थिए ।

आइपिएल २०२३ मा बढीमा ८७ खेलाडी विक्ने छन् । त्यसमा ३० विदेशी खेलाडीको कोटा छ । सर्वाधिक बढी रकम अक्सनमा खर्च गर्न पाउने रकम सनराइजर्स हैदराबादसँग ४२ करोड २५ लाख भारु छ । सबैभन्दा कम कोलकाता नाइट राइडर्ससँग ७ करोड ५ लाख भारु मात्रै छ ।