काठमाडौं (हाम्रो खेलकुद) – आइसिसी विश्वकप लिग–२ त्रिकोणात्मक ओडिआई सिरिजको तेस्रो खेलमा नेपालले घरेलु टोली नामिवियाबाट २ सय ७६ रनको विजयी लक्ष्य पाएको छ ।

युनाईटेड क्रिकेट ग्राउन्ड विन्डहोकमा बुधबार टस हारेर पहिले ब्याटिङको निम्तो पाएको नामिवियाले निर्धारित ५० ओभरमा ७ विकेटको क्षतिमा २ सय ७५ रन बनायो । नामिवियाका मिचेल भान लिंगेनले सर्वाधिक ११९ रनको योगदान दिए । उनले १११ बलमा १५ चौका र १ छक्का प्रहार गरे ।

कप्तान जेरहार्ड इरासमले ७६ बलमा एक चौका र दुई छक्काको सहयोगमा ५३ रन बनाए । जान निकोल लोफ्टी एटनले ३२ बलमा ४ चौका र एक छक्काको सहयोगमा ४० रन बटुले । ओपनर लो हान्ड्रे लोउरेन्सले १४ तथा अर्का ओपनर डिभान ला कुक १८ रनमा आउट भए । जेजे स्मिथ २ रनमा आउट भए । जाने ग्रीन ९ रनमा आउट हुँदा पिक्की या फ्रान्स ११ रनमा अविजित रहे ।

नेपालका ललित राजवंशीले १० ओभरमा ३४ रन खर्चदै ४ विकेट लिए । सोमपाल कामीले १० ओभरमा १ मेडनसहित ५३ रन खर्चदै २ विकेट लिए ।

उत्कृष्ट इनिङ खेलिरहेका मिचेल भान लिंगेनलाई कट एण्ड बाेल्ड गर्दै साेमपालले ओडिआईमा आफ्नाे ५० विकेट पूरा गरेका छन् । सागर ढकालले ६ ओभरमा २७ रन खर्चिएर १ विकेट हात पारे । नेपालले केही वेरमा ब्याटिङ थाल्नेछ ।