एजेन्सी – नेपालका स्पिनर सागर ढकालले दोस्रो एकदिवसीय अभ्यास खेलमा दिल्ली डिस्ट्रिक क्रिकेट एसोसियसनविरुद्ध घातक बलिङ गर्दै दयनीय अवस्थामा पुर्याएका छन् । अरुण जेट्ली स्टेडियममा घरेलु टोली दिल्लीले टस जितेर पहिला ब्याटिङ गरि रहँदा ३१ ओभरमा ८ विकेट गुमाउँदै १ सय १४ रन बनाएको छ ।

सागर ढकालले ४ ओभरमा १२ रन खर्चेर ४ विकेट लिएका छन् । कुशल भुर्तेलले ६ ओभरमा १ मेडनसहित १७ रन खर्चेर २ विकेट लिए । सोमपाल कामीले ४ ओभरमा २ मेडन राख्दै ५ रन खर्चेर १ विकेट लिएका छन् । ललित नारायण राजवंशीले ६ ओभरमा १ मेडनसहित १७ रन खर्चेर १ विकेट लिएका छन् ।

पहिलो खेलमा नेपाल दिल्लीसँग दुई विकेटले पराजित भएको थियो । नेपालले ३ सय ३ रन बनाएपनि उक्त लक्ष्य रोक्न सकेको थिएन । नेपालका कप्तान रोहित पौडेलले उक्त खेलमा १ सय १३ र दीपेन्द्रसिंह ऐेरीले १ सय ९ रनको शतकीय इनिङ खेलेका थिए ।

नेपालले आइसिसी विश्वकप लिग २ त्रिकोणात्मक ओडिआई सिरिज अन्तर्गत नामिबिया भ्रमण अघि दिल्लीमा अभ्यास खेल खेलेको हो । यो अभ्यास खेल हुँदा नेपालले ब्याटिङ र बलिङ दुबैमा १४ जना मध्य कुनैपनि खेलाडीलाई मौका दिनसक्छ ।

नेपालको टोली :

रोहित पौडेल (कप्तान), आसिफ शेख, दीपेन्द्रसिंह ऐरी, कुशल भुर्तेल, ललित राजवंशी, सोमपाल कामी, सागर ढकाल, अर्जुन साउद, ज्ञानेन्द्र मल्ल, आरिफ शेख, गुलशन झा, करण केसी, हरिशंकर शाह र नन्दन यादव ।