काठमाडौं (हाम्रो खेलकुद) – मिलन बोहराले अलराउन्ड प्रदर्शन गरेपछि सुदूरपश्चिम प्रदेशले वाई वाई यू१९ राष्ट्रिय प्रतियोगितामा कर्णाली प्रदेशलाई पाँच विकेटले हराउँदै विजयी सुरुवात गरेको छ ।

जितको लागि १ सय २८ रनको विजयी लक्ष्य पछ्याएको सुदूरले २६.२ ओभरमा ५ विकेट गुमाउँदै १ सय २८ रन बनायो । सुदूरका लागि मिलन बोहराले ४७ बलमा ७ चौका र १ छक्कासहित सर्वाधिक ४२ रन बनाए । उनी अनुज चनाराको बलमा बोल्ड भएपछि अर्धशतक सम्म पुग्न सकेनन् ।

ओपनर दीपक बोहरा १६ बलमा २ चौका र १ छक्कासहित २०, विशाल ऐर ९, अनुराग सिंह १० र दीपक बोहराले २० रन बनाए । गजेन्द्र बोहरा ४ र सुनिल चन्दले १३ रन बनाए ।

कर्णालीका तीव्र गतिका बलर अनुज चनाराले १० ओभरमा १ मेडनसहित ४२ रन खर्चेर ३ विकेट लिए । सन्दीप शाही र मोहन विकले एक एक विकेट लिए ।

त्यसअघि टियु क्रिकेट मैदानमा टस हारेर ब्याटिङको निम्तो पाएको कर्णाली ३२.३ ओभरमा १ सय २७ रनमा अल आउट भएको थियो । कर्णालीका दीनेश अधिकारी ३२ बलमा ५ चौका र १ छक्कासहित सर्वाधिक ३५ रनमा अविजित रहे । उनलाई अर्को एन्डबाट कुनैपनि ब्याटरले साथ दिन सकेनन् ।

ओपनर सुवास ऐर ३५ बलमा ४ चौका र १ छक्कासहित ३० रन बनाए । अन्यले राम्रो प्रदर्शन गर्न सकेनन् । कर्णालीको सुरुवात उत्कृष्ट रह्यो । ओपनर विपिन रावल र सुवास ऐरले पहिलो विकेटका लागि ९.४ ओभरमा ४८ रनको साझेदारी गर्दै राम्रो सुरुवात दिलाएका थिए ।

चोभार एण्डबाट आएका तीव्र गतिका बलर कैलाश ऐरलाई लगातार तीन चौका हान्ने धुनमा मिस हुँदा सुवास एलबीडब्लू आउट भएका थिए । त्यसपछि कर्णालीले लगातार विकेट गुमायो । राम्रो सुरुवात गरेपनि कर्णालीले ५१ रन जोड्न ९ विकेट गुमाएपछि ९९-९ को दयनीय अवस्थामा पुगेको थियो ।

१८ बल खेल्दै रोशन शाही २ रनमा आउट भए । स्पिनर नरेन्द्र साउदले विपिन शाहीलाई १९ रनमा एलबीडब्लू धरापमा पारेपछि कर्णाली १५.५ ओभरमा ६०-३ को अवस्थामा पुगेको थियो । कप्तान विपिनको विकेटपछि कर्णालीका ब्याटर क्रिजमा सम्हालिन सकेनन् । विपिनले ४६ बलमा २ चौका प्रहार गरे ।

अभिषेक बम शून्यमा रन आउट भए । सन्दीप शाही १० रनमा मिलन बोहराको बलमा बोल्ड आउट भए । उनले १८ बल खेल्दै १ चौका र १ छक्का हाने । त्यसपछिका तीन ब्याटर मोहन विक, अनुज चनारा र युनिस सिंह शून्यमा पेभेलिएन फर्केका थिए ।
अन्तिम विकेटका लागि दीनेश अधिकारी र विनित खत्रीले २८ रनको साझेदारी गरेका थिए । मिलन बोहराले विनित खत्रीलाई एक रनमा बोल्ड गरे ।

सुदूरपश्चिमका मिलन बोहराले ७।३ ओभरमा १ मेडनसहित २१ रन खर्चेर ३ विकेट लिए । नरेन्द्र साउदले ७ ओभरमा १ मेडनसहित २१ रन खर्चेर २ विकेट लिए । हेमन्त धामी र कैलाश ऐरले एक एक विकेट लिए ।