काठमाडौं (हाम्रोा खेलकुद) – नेपालले तीव्र गतिका बलर करण केसीलाई युएईसँग तेस्रो तथा निर्णायक खेलमा बेन्चमा राखेको छ । टियु क्रिकेट मैदानमा भएको टसमा नेपालका कप्तान रोहित पौडेलले टस जितेर पहिला फिल्डिङ गर्ने निर्णय लिएका हुन् । सिक्का रोहितले फालेका थिए । टस पनि रोहितले नै जिते ।

नेपालले आजको खेलमा एक परिवर्तन गरेको छ । करण केसीलाई बेन्चमा राख्दा हरिशंकर शाहलाई मौका दिएको छ । करण पहिलो खेलमा विकेट विहीन बन्दै ५९ रन खर्चेका थिए । दोस्रो खेलमा एक विकेट लिँदा ३६ रन खर्चेर १ विकेट लिएका थिए ।

नेपालले पहिलो खेलमा बायाँ हाते स्पिन अलराउन्डर हरिशंकर शाहलाई डेब्यू दिएको थियो । उक्त खेलमा हरिशंकर ८ रनमा आउट भएका थिए । उक्त खेलमा हरिले ५ ओभर बलिङ गर्दा २६ रन खर्चेको थियो ।

तीन खेलको सिरिज १–१ को बराबरी अवस्थामा छ । नेपाल पहिलो खेलमा ८४ रनले पराजित हुँदा दोस्रो खेलमा ३ विकेटले विजयी भएको थियो । दुबै खेलमा नेपालको ब्याटिङ अपेक्षा अनुसार राम्रो हुन सकेको छैन ।

नेपाल अन्तिम खेलमा सानदार ब्याटिङका साथ सिरिज उपाधि जित्न चाहन्छ । दोस्रो खेलमा १ सय ९२ रनको विजयी लक्ष्य पछ्याउनेक्रममा नेपालले १०६–६ अवस्थाबाट पूरा गरेको थियो ।

उक्त खेलमा आरिफ शेखले ३३ र गुलशन झाले ३७ रन बनाउँदै नेपालको हार टारेका थिए । नेपालका शीर्षक्रमका ब्याटरले उत्कृष्ट सुरुवात र जिम्मेवारी प्रदर्शन गर्नुपर्ने हुन्छ ।

नेपालको प्लेइङ ११ :

आसिफ शेख, अर्जुन साउद, कुशल भुर्तेल, ज्ञानेन्द्र मल्ल, दीपेन्द्रसिंह ऐरी, रोहित पौडेल (कप्तान), आरिफ शेख, हरिशंकर शाह, सोमपाल कामी, गुलशन झा र ललित राजवंशी ।