काठमाडौं (हाम्रो खेलकुद) – युएईका युवा स्पिनर आयन अफ्जल खानले आफ्नो ओडिआई डेब्यू खेलको पहिलो खेलमा नेपालविरुद्ध सुरुवातमै तीन महत्वपूर्ण विकेट लिएका छन् ।

जितको लागि २ सय ६४ रनको विजयी लक्ष्य पछ्याएको नेपालले ८.१ ओभरमा ३ विकेट गुमाउँदै ३२ रन बनाएको छ । नेपालका अर्जुन साउद १४ रनमा क्रिजमा छन् ।

युएईका १७ वर्षीय स्पिनर आयन खानले चोभार एण्डबाट बलिङ गर्दै डेब्यूको पहिलो बलमै आसिफ शेखलाई १२ रनमा एलबीडब्लू आउट गरे । त्यसको एक बलपछि ज्ञानेन्द्र मल्ल कभरमा एलिशान शराफुबाट शून्यमा क्याच आउट भए ।

१७ वर्षीय आयनले टि२० विश्वकप खेलेका छन् । टि२० विश्वकप खेलेपछि नेपाल आएका हुन् । करिअरको पहिलो ओडिआई खेल खेलेका आयनले पहिलो ओभरमै दुई विकेट लिँदै सानदार सुरुवात दिलाएका हुन् । आयनले नै नवौं ओभरको पहिलो बलमा कप्तान रोहित पौडेललाई एक रनमा बोल्ड आउट गरे ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको युएईले निर्धारित ५० ओभरमा ८ विकेट गुमाउँदै २ सय ६३ रन बनायो । युएईका रोहन मुस्तफाले ७३ बलमा ७ चौकासहित सर्वाधिक ५३ रनमा बनाए ।

नेपालका तीव्र गतिका बलर गुलशन झाले ६ ओभरमा ६ रन खर्चेर २ विकेट लिए । सोमपाल कामीले १० ओभरमा ६७ रन खर्चेर १ विकेट लिए । दीपेन्द्रसिंह ऐरीले ८ ओभरमा ३० रन खर्चेर १ विकेट लिए ।