काठमाडौं (हाम्रो खेलकुद) – युएईका अनुभवी बायाँ हाते अलराउन्डर रोहन मुस्तफाले नेपालसँगको पहिलो ओडिआई खेलमा अर्धशतक प्रहार गरेका छन् । टियु क्रिकेट मैदानमा टस हारेर पहिला ब्याटिङको निम्तो पाएको युएईले ३९ ओभरमा ४ विकेट गुमाउँदै १ सय ८७ रन बनाएको छ । मुस्तफा ७३ बलमा ७ चौकासहित ५३ रनमा आउट भए ।

मुस्तफाको यो ओडिआई करिअरको छैटौं अर्धशतक हो । मुस्तफाको नेपालविरुद्ध दोस्रो अर्धशतक हो । गत मार्चमा मुस्तफाले नेपालविरुद्ध ६० रन बनाएका थिए । टियु एण्डबाट आएका तीव्र गतिका बलर गुलशन झाले आक्रामक सुरुवात गरेका ओपनर मोहम्मद वासिमलाई ४४ रनमा बोल्ड आउट गर्दै नेपाललाई पहिलो सफलता दिलाए । वासिमले ४१ बलमा ६ चौका र १ छक्का प्रहार गरे ।

अन्तिम बलमा कभरमा कुशल भुर्तेलले युएईका कप्तान सिपी रिजवानको दुई रनमा उत्कृष्ट क्याच लिएपछि नेपालले एकै ओभरमा दुई विकेट लिएको थियो । युएईको सुरुवात भने राम्रो रह्यो । पहिलो विकेटका लागि वासिम र वृत्य अरविन्दले १४.२ ओभरमा ७५ रनको साझेदारी गर्दै राम्रो सुरुवात दिलाएका हुन् ।

११ औं ओभरको चौथो बलमा नेपालले वृत्य अरविन्दलाई १८ रनमा रन आउट गर्न चुकेको थियो । नन स्ट्राइकबाट मोहम्मद वासिमसँग तालमेल नमिल्ला उनी पिचको आधा भागमा गएर फर्किनु परेको थियो । नेपाललाई रन आउट गर्ने राम्रो अवसर आएपनि चुकेको थियो ।

चोभार एण्डबाट आएका स्पिन अलराउन्डर दीपेन्द्रसिंह ऐरीले युएईका युवा स्टार वृत्य अरविन्दलाई २७ औं ओभरको पाँचौं बलमा एलबीडब्लू आउट गरे । अरविन्दले ८२ बलमा ६ चौकासहित ४० रनमा आउट भए । तेस्रो विकेटका अरविन्द र रोहन मुस्तफाले ५२ रनको साझेदारी गरेका थिए ।