राकेश तिमल्सिना
चितवन– पूर्वाञ्चलनमा सातौं राष्ट्रिय खेलकुद समापनकै दिन चितवनमा शिव पौडेल स्मृति कप अन्तर कलेज क्रिकेट प्रतियोगिताको चौथो संस्करण सुरु हुने भएको छ । वीरेन्द्र बहुमुखी क्याम्पस नेवि संघ इकाइ कमिटीको आयोजनामा मा प्रतियोगिता विशाल चोकस्थित क्रिकेट मैदानमा पुस १५ गते सुरु हुनेछ ।

पुस २ गतेबाट सुरु हुने भनिएको सोही समयमा राष्ट्रिय खेलकुद सञ्चालन हुने भएकाले प्रतियोगिता रोक्नु परेको थियो । यसअघि ३ पटक सफलतापुर्वक सम्पन्न भएको प्रतियोगितालाई आउने बर्षमा निरन्तरताका लागि प्रयास गरिने प्रतियोगिता संयोजक एवं पूर्व राष्ट्रिय क्रिकेट खेलाडी अनिल अधिकारी बताए । स्थानिय स्तरका खेलाडीले आफ्नो कौशल देखाउन प्रतियोगिता एउटा राम्रो माध्यम बन्नेमा आयोजकहरु आशावादी छन् । चितवन क्रिकेट एकेडेमीका सञ्चालक एवंम् नेपाली क्रिकेटका पूर्व कप्तान राजु खड्का स्थानिय प्रतियोगिता निरन्तर आयोजना हुनु पर्नेमा जोड दिन्छन् ।

प्रतियोगितामा सहभागि हुने १८ टोलीलाई दुई समूहमा २ समूहमा विभाजन गरी लिग कम नकआउट आधारमा प्रतिस्पर्धा गराइनेछ । प्रतियोगितामा राष्ट्रिय टोलीका खेलाडी,क्षेत्रिय तथा उमेर समूहका र स्थानिय खेलाडीको सहभागिता रहनेछ । स्थानिय सन्तोष न्यौपाने प्रतियोगीताका लागि आफुहरु तयार रहेको बताए । स्थानिय प्रतियोगिताले राष्ट्रिय स्तरका खेलाडीसँग खेल्न पाउने अवसर पाउनु आफुहरुका लागि उत्साजनक भएको अर्का स्थानिय खेलाडी सुनिल दहालले बताएका छन् ।
प्रतियोगिताको उद्घाटन सत्रमा लोकप्रिय पप ब्याण्ड नाइन्टिन सेभेन्टी फोर एडी, इलेभेन थर्टी बसन, राजु लामा लगायतका संगीतकर्मीहरुको सांगीतिक प्रस्तुति रहने संयोजक अधिकारीले जानकारी दिए । प्रतियोगिताको विजेताले उपाधिसहित २ लाख ६८ हजार नौँ सय दुई रुपैयाँ प्राप्त गर्नेछन । दोस्रो हुने टोलीले १ लाख ३८ हजार नौँ सय दुई रुपैयाँ पाउनेछन् । प्रतियोगिता आयोजनाका लागि झन्डै २६ लाख रुपैयाँ खर्च हुने अनुमान गरिएको छ । २०६८ साल पुस २ गते भरतपुर कारागारमा मृत्यु भएका तरुण दल चितवनका तत्कालिन अध्यक्ष स्व. शिव पौडेलको सम्झनामा क्रिकेट प्रतियोगिताको आयोजना गरिदै आएको छ ।