काठमाडौं (हाम्रो खेलकुद) – नेपाल एपिएफ क्लबले प्रधानमन्त्री कप एकदिवसीय राष्ट्रिय प्रतियोगिताको फाइनलमा त्रिभुवन आर्मी क्लबविरुद्ध टस जितेर पहिला फिल्डिङ गर्ने भएको छ । टियु क्रिकेट मैदानमा एपिएफका कप्तान शर भेषावकरले टस जितेर पहिला फिल्डिङ गर्ने निर्णय लिएका छन् ।

लामो समयको विवादपछि तीव्र गतिका बलर सोमपाल कामीले फाइनल खेल्न पाउने भएका छन् ।आर्मीले आजको खेलमा आर्मीले एक परिवर्तन गरेको छ । स्पिनर साहब आलमको औंलामा चोटका कारण सोमपाल कामी आएका छन् ।

आर्मीले आजको खेलमा सोनु तामाङ, आकाश चन्द र साहब आलम बेन्चमा छन् । एपिएफले आजको खेलमा आयुषमान बम, दीपक बोहरा र पुरन विकलाई बेन्चमा राखेका छन् ।

खेल ४०-४० ओभरको हुनेछ । खेल ११ बजे सुरु हुनेछ । सोमपाल कामीको विवादको कारण खेल दुई घण्टा ढिलो भएर सुरु भएको हो । आर्मी र एपिएफबीचको खेल बिहान ९ बजे टियु क्रिकेट मैदानमा सुरु हुनुपर्ने थियो। नियम अनुसार टस विहान ८ः३० मा हुनुपर्ने थियो ।

तर आर्मीले प्लेइङ ११ मा सोमपालको नाम समावेश गरेपछि एपिएफका कप्तान शरद भेषावकरले टस गर्न मानेका थिएनन् । म्याच रेफ्री बुद्धि बहादुर प्रधानसमक्ष उनले आर्मीले सोमपाललाई प्लेइङ ११ मा समावेश गर्न नपाउने तर्क राखेका थिए ।

आर्मीले १४ सदस्यीय टोलीमा अनिल मण्डलको स्थानमा सोमपाल कामीलाई प्रतिस्थापन गर्दै प्लेइङ ११ मै राखेको थियो । तर उनै सोमपालको स्थानमा प्रतियोगिता चल्दा अनिल समावेश भएका थिए । प्रतियोगिताको सुरुवातमा सोमपालको नाम आर्मीको टोलीमा थियो । डेंगु संक्रमणका कारण उनले खेल्नेमा शंका बढेपछि आर्मीले सोमपालको स्थानमा अनिललाई टोलीमा राख्यो । तर फाइनलका लागि भने आर्मीले सोमपाललाई टोलीमा समेट्यो ।

आर्मीले खेलाडी परिवर्तनका लागि २४ घण्टाअघि नै निवेदन दिएकोमा प्रतियोगिताको प्राविधिक समितिले स्वीकृति दिएको थियो । प्राविधिक समितिको त्रुटीकै कारण ढिलो सुरु हुन पुगेको हो ।

एपिएफका कप्तान शरद भेषावकर, आर्मीका कप्तान विनोद भण्डारी र म्याच अफिसियलबीच टियु मैदानमा लगातार छलफल भएपनि निष्कर्ष निस्कन लामो समय लागेको थियो ।

एपिएफले प्रतियोगितामा नाम समावेश गरेका खेलाडी चोटका कारण बाहिर भएपछि पुनः समावेश गर्न नपाइने अडान राखेको थियो । आर्मीले खेलाडी परिवर्तन गरेकोबारे म्यानेजरलाई कुनै जानकारी नदिइएको एपिएफको भनाइ थियो । आर्मीले भने प्राविधिक समितिको स्वीकृति आइसकेको हुँदा खेल्न पाउनुपर्ने अडान राखेको थियो ।

आर्मीले सोमपाल कार्मीलाई पहिलो खेलमा एपिएफ क्लबविरुद्ध बुझाएको १४ खेलाडीको लिष्टमा राखेको थियो । सुदूरपश्चिमविरुद्ध पनि सोमपाल अन्तिम १४ मा थिए । मुलपानी क्रिकेट मैदानमा गण्डकीविरुद्ध भने सोमपालको स्थानमा आर्मीले अनिल मण्डललाई खेलाएको थियो । सोमपालकै स्थानमा आर्मीले ओपनर अनिल मण्डललाई खेलाएको थियो ।

त्यसपछि कर्णालीविरुद्ध खेल्दा भने सोमपाल अन्तिम १५ मा थिएनन् । कर्णालीविरुद्ध सोमपालको स्थानमा अनिल मण्डल थिए । सेमिफाइनल खेलमा पनि पुलिस क्लबविरुद्ध पनि सोमपाल अन्तिम १५ मा थिएनन् । आर्मीले अनिलकै स्थानमा सोमपलको प्रतिस्थापन माग गरेको थियो । माग गरेको २४ घण्टा नपुगेपछि पुलिसविरुद्ध खेल भने उनले गुमाउन पुगेका थिए ।

आर्मीले सेमिफाइनल खेलमा नेपाल पुलिस क्लबलाई दुई विकेटले हराउँदै फाइनलमा स्थान बनाएको थियो । एपिएफले मधेश प्रदेशलाई ७ विकेटले हराउँदै फाइनलमा स्थानएको थियो । एपिएफ दोस्रो संस्करण र आर्मी चौथो संस्करणको च्याम्पियन टोली हुन् । आर्मी पाँच संस्करणमा सबै फाइनल खेल्ने एक्लो टोली हो ।