काठाडौं (हाम्रो खेलकुद) – त्रिभुवन आर्मीले क्लबले प्रधानमन्त्री कप एकदिवसिय राष्ट्रिय प्रतियोगितामा नेपाल पुलिस क्लबमाथि दुइ विकेटको ऐतिहासिक जित निकाल्दै फाइनलमा पुगेको छ । आर्मीले पुलिसमाथि कीर्तिमानी योगफल पूरा गर्दै लगातार पाँचौं पटक फाइनलमा स्थान बनाएको हो ।

अन्तिम ६ बलमा आमीलाई जितको लागि ८ रन चाहिँदा हातमा दुई विकेट थियो । दीपेन्द्रको पहिलो बलमा राजेश पुलामीले रन लिएनन् । दोस्रो बलमा एज लागेर चौका हुन पुग्यो । तेस्रो बलमा एक रन बटुले । चौथो बलमा दुई रनको अवसर भएपनि राजेशले दोस्रो रन लिन मानेन ।

दुई बलमा दुई चाहिँ राजेशले पाँचौं बलमा छक्का हान्दै फाइनल पक्का गराए । जितको लागि ३ सय ५ रनको विशाल विजयी लक्ष्य पछ्याएका आर्मीले ४९.५ ओभरमा ८ विकेट गुमाउँदै पूरा गर्यो । यो प्रधानमन्त्री कप इतिहासकै सर्वाधिक ठूलो योगफल पूरा भएको हो । यसअघि २०१८ मा एपिएफले २ सय ४० रनको लक्ष्य तत्कालिन प्रदेश ४ (गण्डकीविरुद्ध ) पूरा गरेको थियो ।

आर्मीका युवा ब्याटर रोहित पौडेलले ८७ बलमा ९ चौकासहित सर्वाधिक ८९ रनमा आउट भए । रोहित तीव्र गतिका बलर राशिद खानको बलमा मिड विकेटमा करण केसीबाट सहज क्याच आउट हुन पुगेपछि घरेलु क्रिकेटमा पहिलो शतक हान्न ११ रनले चुकेका थिए ।

ओपनर हरि चौहान ९२ बलमा ८ चौका र १ छक्कासहित ७५ रनमा आउट भए । तेस्रो विकेटका लागि हरि चौहान र रोहित पौडेलले १ सय ३५ रनको शतकीय साझेदारी गर्दै जितको आधार बलियो बनाएका थिए । हरि स्पिनर ललित नारायण राजवंशीको ३३ औं ओभरको दोस्रो बलमा बोल्ड हुन पुगेका थिए ।

ओपनर अर्जुन साउद तीव्र गतिका बलर करण केसीको सातौं ओभरको दोस्रो बलमा ११ रनमा कट एण्ड बोल्ड आउट भएका थिए । अर्जुनले २० बलमा २ चौका प्रहार गरे । करणको बलमा फाइन लेगमा सट खेलेका भीम सार्कीको क्याच राशिद खानले लिएका थिए । राशिद खानले उत्कृष्ट क्याच लिएपछि भीम १० रनमा पेभेलिएन फर्के ।

कप्तान विनोद भण्डारी करण केसीको ४३ औं ओभरको चौथो बलमा ३२ रनमा एलबीडब्लू आउट भए । विनोदले ३० बलमा ३ चौका र २ छक्का हाने । त्यसअघिको बलमा विनोदले छक्का हानेका थिए । यसै ओभरको अन्तिम बलमा कुशल मल्ल एज लागेर दीलिप नाथबाट क्याच आउट भए ।

राजेश पुलामी मगरले ब्यक्तिगत १६ रनमा जीवनदान पाए । तीव्र गतिका बलर गुलशन झा ४४ औं ओभरको चौथो बलमा दीलिप नाथले राजेश पुलामीको क्याच छाड्न पुगेका थिए ।

तल्लोक्रमका विक्रम सोबले १८ बलमा ३ चौका र २ छक्कासहित ३० रन बनाए । राजेश पुलामी मगर ३७ बलमा ३ चौका र २ छक्कासहित ४३ रनमा अविजित रहे ।

पुलिसका तीव्र गतिका बलर करण केसीले १० ओभरमा ५२ रन खर्चेर ६ विकेट लिए । राशिद खान र ललितले एक एक विकेट लिए ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको पुलिसले निर्धारित ५० ओभरमा ४ विकेट गुमाउँदै ३ सय ४ रन बनाएको थियो । पुलिसका कप्तान दीपेन्द्रसिंह ऐरीले १ सय २५ बलमा ११ चौका र ५ छक्कासहित सर्वाधिक १ सय ४० रनको इनिङ खेले । दीपेन्द्रको यो राष्ट्रिय प्रतियोगितामा हालसम्मकै उत्कृष्ट प्रदर्शन हो ।

यसअघि गतवर्ष काठमाडौं मेयर्स कपमा दीपेन्द्रले एपिएफविरुद्ध १ सय ४० रनको इनिङ खेलेका थिए । काठमाडौं मयर्स कप भने राष्ट्रिय प्रतियोगिता थियो । त्यस्तै प्रधानमन्त्री कपमा यो दोस्रो ठूलो इनिङ हो । यसअघि एपिएफका प्रदीप ऐरीले २०१८ मा मधेश प्रदेश ९तत्कालिन प्रदेश २० विरुद्ध १ सय ५८ रन बनाएका थिए ।

दीपेन्द्र प्रधानमन्त्री कपमा एकै प्रतियोगितामा दुई शतक हान्ने पहिलो खेलाडी हुन् । दीपेन्द्रले ४३ औं ओभरको अन्तिम बलमा हरि चौहानलाई काउकर्नरमा चौका हान्दै १ सय ७ बलमा शतक पूरा गरेका थिए । दीपेन्द्रले पहिलो खेलमा बागमती प्रदेशविरुद्ध ८२ बलमा ११ चौका र ४ छक्कासहित १ सय ८ रनको शतकीय इनिङ खेलेका थिए ।

यसअघि प्रधानमन्त्री कप एकदिवसीय प्रतियोगिता चार संस्करण सकिँदा कुनैपनि खेलाडीले एकै प्रतियोगितामा दुई शतक प्रहार गरेका थिएनन् । चौथो विकेटका लागि आरिफ शेख र दीपेन्द्रसिंह ऐरीले २ सय ४ रनको दोहोरो शतकीय साझेदारी गरे । प्रधानमन्त्री कपमा यो दोस्रो पटक दोहोरो शतकीय साझेदारी हो ।

यसअघि प्रदीप ऐरी र सुवास खकुरेलले दोस्रो विकेटका लागि २०१८ मा मधेशविरुद्ध २ सय ३१ रनको शतकीय साझेदारी गरेका थिए । आरिफ शेख १ सय ९ बलमा ८ चौका र २ छक्कासहित ९१ रनमा अविजित रहे । ओपनर कुशल भुर्तेल ३२ बलमा ५ चौका र १ छक्कासहित ३१, सुनिल धमला १३ र अमित श्रेष्ठ १० रनमा आउट भए ।

आर्मीका विक्रम सोब १० ओभरमा ६६ रन खर्चेर ३ विकेट लिए । सुशन भारीले एक विकेट लिए । फाइनल खेल शनिबार हुनेछ । पहिलो खेलमा नेपाल एपिएफ क्लबले मधेश प्रदेशलाई ७ विकेटले हराउँदै फाइनलमा स्थान बनाएको थियो ।

यसअघि फाइनल पुग्ने र विजेता टोलीहरु

पहिलो संस्करणको फाइनल वर्षाको कारण प्रभावित हुँदा उपाधि नेपाल आर्मी र नेपाल पुलिस क्लबले संयुक्त रुपमा उपाधि बाँडेका थिए । दोस्रो संस्करण २०१८ को फाइनलमा एपिएफले आर्मीलाई ६ विकेटले हराउँदै उपाधि जितेको थियो । तेस्रो संस्करण २०१९ मा पुलिसले आर्मीलाई ४ विकेटले हराउँदै च्याम्पियन बनेको थियो ।

चौथो संस्करणको फाइनलमा आर्मीले एपिएफलाई ३३ रनले हराउँदै उपाधि जितेको थियो । गतवर्ष नेपालले टि२० विश्वकप ग्लोबल छनोट ए खेल्ने भएपछि प्रधानमन्त्री कप एकदिवसियको सट्टा क्यानले टि२० शैलीमा गरेको थियो । गतवर्ष टि२० राष्ट्रिय प्रतियोगिता उपाधि एपिएफले पुलिसलाई २१ रनले हराउँदै उपाधि जितेको थियो ।