काठमाडौं (हाम्रो खेलकुद) – सुदूरपश्चिम प्रदेशले प्रधानमन्त्री कप एकदिवसीय प्रधानमन्त्री कप राष्ट्रिय प्रतियोगितामा कर्णाली प्रदेशमाथि पाँच विकेटको सहज जित हात पारेको छ । अन्तिम खेलमा जितका साथ सुदूर बाहिरिएको छ ।

जितको लागि १ सय ५१ रनको विजयी लक्ष्य पछ्याएको सुदूरले २९.४ ओभरमा ५ विकेट गुमाउँदै पूरा गर्यो । सुदूरको जितको लागि ओपनर गजेन्द्र बोहराले ५१ बलमा ५ चौका र १ छक्कासहित ४१ रनमा आउट भए ।

शेर मल्ल ३३ बलमा ३ चौका र ३ छक्कासहित ३४ रनमा अविजित रहे । राजु रिजालले २९ बलमा ४ चौका र १ छक्कासहित २४ रनमा अविजित रहे । टेक रावल १८, बसन्त खत्री ६, विरेन्द्र नाथ र दिपक टमाटा ९–९ रनमा आउट भए ।

कर्णालीका रविन्द्रजंग शाहीले १० ओभरमा १ मेडनसहित ५९ रन खर्चेर ३ विकेट लिए । दिवान पुनले १० ओभरमा ३ मेडनसहित २५ रन खर्चेर २ विकेट लिए ।

त्यसअघि मुलपानी क्रिकेट मैदानमा टस हारेर पहिला ब्याटिङको निम्तो पाएको कर्णाली ३८.१ ओभरमा १ सय ५० रनमा अल आउट भयो । कर्णालीका अर्जुन घर्तीले ९६ बलमा ४ चौका र ५ छक्कासहित सर्वाधिक ७० रन बनाए । उनको यो राष्ट्रिय प्रतियोगितामा पहिलो अर्धशतक हो ।

सुवास ऐरले २२ बलमा ५ चौका प्रहार गर्दै २४ रनमा आउट भए । कप्तान रविन्द्रजंग शाही ७, विपिन रावल शून्य, विपिन शाही २, हिमान्शु शाही ३८ बलमा १ चौकासहित १२, दीपेन्द्र रावत ८, प्रकाश जैशी ९, दिवान पुन १ र अनुज चनारा शून्यमा आउट भए ।

सुदूरपश्चिम प्रदेशका नारायण जोशीले ५.१ ओभरमा १६ रन खर्चेर ४ विकेट लिए । तीव्र गतिका बलर हेमन्त धामीले १० ओभरमा १ मेडनसहित ३९ रन खर्चेर ३ विकेट लिए । गजेन्द्र बोहराले ६ ओभरमा २७ रन खर्चेर २ विकेट लिए । मिलन बोहराले एक विकेट लिए ।

सुदूर ४ खेलमा २ अंकका साथ चौथो स्थानमा रहेर बाहिरियो । समूह ए मा एपिएफ ४ खेलमा ७ अंकका साथ सेमिफाइनलमा पुगेको छ । गण्डकी ४ खेलमा ५ अंकका साथ दोस्रो स्थानमा छ ।

आर्मी ३ खेलमा ४ अंकका साथ तेस्रो स्थानमा छ । आर्मीले मंगलबार कर्णालीसँग खेल्नेछ । आर्मी विजयी भए सेमिफाइनलमा पुग्नेछ । कर्णाली विजयी भएमा गण्डकी सेमिफाइनलमा पुग्नेछ ।