काठमाडौं (हाम्रो खेलकुद) – कप्तान हरिशंकर शाहसहित तीन खेलाडीको अर्धशतकमा मधेश प्रदेशले प्रधानमन्त्री कप एकदिवसीय राष्ट्रिय प्रतियोगितामा लुम्बिनी प्रदेशलाई २ सय ६० रनको बलियो लक्ष्य दिएको छ ।

मुलपानी क्रिकेट मैदानमा टस हारेर पहिला ब्याटिङ थालेको मधेश ४८.४ ओभरमा २ सय ५९ रनमा अल आउट भयो । मधेशका कप्तान हरिशंकर शाहले ९० बलमा १३ चौका र १ छक्कासहित सर्वाधिक ७६ रन बनाए ।

ओपनर सन्तोष कार्कीले ६० बलमा ५ चौका र ३ छक्कासहित ५० रनमा आउट भए । विकेटकिपर अनिल शाहले ४९ बलमा ५ चौका र २ छक्कासहित ५० रनमा आउट भए ।

मधेशलाई ओपनर सन्तोष कार्की र हरिशंकर शाहले पहिलो विकेटका लागि २२.१ ओभरमा १ सय ३० रनको सानदार शतकीय साझेदारी गर्दै उत्कृष्ट सुरुवात दिलाएका थिए । देव खनालले सन्तोषलाई सुनिल भण्डारीबाट क्याच गराउँदै साझेदारी तोडे ।

त्यसपछि अनिल खरेलले हरिशंकरलाई एलबीडब्लू आउट गरेपछि लुम्बिनी खेलमा फर्किएको थियो । अनिलको यो लगातार दोस्रो अर्धशतक हो । अनिलले पहिलो खेलमा प्रदेश १ विरुद्ध ६१ रन बनाएका थिए । अनिल यसै सिजनदेखि पुलिस छाडेर घरेलु टोली फर्किएका छन् ।

विवेक यादव ३८ बलमा २ छक्का हान्दै २१ र आदिल आलम १२ रनमा आउट भए । रोहन विक ७ र ईमरान शेखले १० रन बनाए । लुम्बिनी प्रदेशका तीव्र गतिका बलर कृष्ण कार्कीले ८ ओभरमा १ मेडनसहित ३५ रन खर्चेर ३ विकेट लिए ।

अनिल खरेलले ९.४ ओभरमा १ मेडन सहित ३७ रन खर्चेर २ विकेट लिए । मोहम्मद हुसेन, बसिर अहमद र देव खनालले एक एक विकेट लिए ।