काठमाडौं (हाम्रो खेलकुद) – तीव्र गतिका बलर फिर्दोस अन्सारीको पाँच विकेट लिएपछि मधेश प्रदेशले प्रधानमन्त्री कप एकदिवसीय राष्ट्रिय प्रतियोगितामा प्रदेश एकलाई २ सय १५ रनको मध्यम लक्ष्य दिएको छ ।

मुलपानी क्रिकेट मैदानमा टस हारेर पहिला ब्याटिङ थालेको मधेश ४८.१ ओभरमा २ सय १४ रनमा अल आउट भयो । मधेशको लागि विकेटकिपर अनिल शाहले ८९ बलमा ५ चौका र १ छक्कासहित सर्वाधिक ६१ रनको योगदान दिए ।

विवेक यादवले ५४ बलमा २ चौका र १ छक्कासहित ३२ र रोहन विकले ४९ बलमा ४ चौकासहित २८ रनमा आउट भए । फिर्दोसले दुवै ओपनर सन्तोष कार्की र कप्तान हरिशंकर शाहलाई आउट गरेका थिए । सन्तोष फिर्दोसको पहिलो ओभरको पाँचौं बलमा शून्यमा एलबीडब्लू आउट भए ।

हरिशंकर १५ रनमा विकेटकिपर निरज मुखियाबाट क्याच आउट हुन पुगेका थिए । फिर्दोसले विवेक यादवलाई ७ र विशाल शुश्लिङलाई ३ रनमा आउट भएका थिए ।

फिर्दोसले प्रदीप पासवानलाई एक रनमा एलबीडब्लू आउट गर्दै पाँच विकेट पूरा गरेका थिए । उनको यो राष्ट्रिय प्रतियोगितामा पहिलो पाँच विकेट हो । तल्लोक्रमका रुपेशसिंह २५ बलमा ३० रनमा आउट भए ।

प्रदेश एकका फिर्दोस अन्सारीले ९.१ ओभरमा १ मेडनसहित ३४ रन खर्चेर ५ विकेट लिए । सिद्धान्त लोहनीले १० ओभरमा १ मेडनसहित ४४ रन खर्चेर ३ विकेट लिए । श्रवण यादव र लव कामतले एक एक विकेट लिए ।