काठमाडौं (हाम्रो खेलकुद) – प्रदेश एकका कप्तान सिद्धान्त लोहनीले प्रधानमन्त्री कप एकदिवसीय राष्ट्रिय प्रतियोगितामा छक्काको वर्षा गराउँदै बागमती प्रदेशविरुद्ध विष्फोटक ब्याटिङ गरेका छन् ।

सिद्धान्तको विष्फोटक ब्याटिङ र अंकित सुवेदीको शतकमा प्रदेश एकले बागमतीलाई ३ सय ५ रनको विशाल लक्ष्य दिएको छ । टियु क्रिकेट मैदानमा टस जितेर पहिला ब्याटिङ रोजेको प्रदेश एक ४९.५ ओभरमा ३ सय ४ रनमा अल आउट भयो ।

कप्तान सिद्धान्त लोहनीले ४० बलमा ३ चौका र ८ छक्कासहित ७२ रनको विष्फोटक इनिङ खेले । सातौं नम्बरमा ब्याटिङ गर्दै सिद्धान्तले बागमतीका स्तरिय बलरविरुद्ध विष्फोटक ब्याटिङ गरेका हुन् । सिद्धान्तले घरेलु क्रिकेटमा लामो समयपछि सानदार पूनरागमन गरेका हुन् ।

सिद्धान्तले २९ बलमा प्रतिश जि.सीलाई चौका हान्दै अर्धशतक पूरा गरेका थिए । सिद्धान्त ३५ औं ओभरको तेस्रो बलमा सोनु अन्सारी आउट भएपछि ब्याटिङका लागि आएका थिए । ३६ औं ओभरको अन्तिम बलमा सूर्यलाई छक्का हान्दै सिद्धान्तले हात खोलेका थिए ।

४० औं ओभरमा तिलकराज भण्डारीलाई सिद्धान्तले दुई छक्का र एक चौका लगातार हानेका थिए । ४२ औं ओभरमा प्रतिश जि.सीलाई सिद्धान्तले दोस्रो बलमा चौका र त्यसपछिका दुई लगातार छक्का हानेका थिए । प्रतिशलाई पुन ४४ औं ओभरमा एक चौका र एक छक्का हाने ।

सिद्धान्त तीव्र गतिका बलर नन्दन यादवको ४७ औं ओभरको पहिलो बलमा ठूलो सट खेल्ने धुनमा एज लागेर मिडअनमा कट एण्ड बोल्ड आउट भए । सिद्धान्त लामो समयपछि घरेलु क्रिकेटमा सानदार प्रदर्शन गरेका हुन् ।

सिद्धान्तले २०२१ मा कर्णालीविरुद्ध ६६ रनपछि पहिलो अर्धशतक हो । प्रदेश एकका ओपनर अंकित सुवेदीले १ सय ३४ बलमा १२ चौका र १ छक्कासहित सर्वाधिक १ सय १० रनको शतकीय इनिङ खेलेका थिए ।

उनले १ सय २२ बलमा आफ्नो राष्ट्रिय प्रतियोगितामा पहिलो शतक हानेका हुन् । बागमती प्रदेशका रामनरेश गिरीले ९.५ ओभरमा १ मेडनसहित ४२ रन खर्चेर ५ विकेट लिए ।