एजेन्सी – आइसिसी टि२० विश्वकपमा आज इंग्ल्यान्डले न्युजिल्यान्डसँग खेल्दैछ । खेल नेपाली समय अनुसार दिउँसो १ : ४५ मा ब्रिस्बेनमा सुरुहुनेछ । सुपर १२ को समूह ए मा रहेको न्युजिल्यान्ड आज विजयी हुँदा सेमिफाइनलमा पुग्ने पहिलो टोली बन्नेछ ।

उपाधि दाबेदार इंग्ल्यान्ड यस खेलमा पराजित हुँदा बाहिरिने लगभग पक्कापक्कि हुनेछ । त्यसैले इंग्ल्यान्डलाई जित्नै पर्ने दबाब छ । न्युजिल्यान्डले पहिलो खेलमा अष्ट्रेलियालाई ८९ रनले पराजित गरेको थियो । दोस्रो खेल अफगानिस्तानसँग अंक बाँडेको थियो । तेस्रो खेलमा श्रीलंकालाई ६५ रनले हराएको थियो । अव न्युजिल्यान्डले शुक्रबार आयरल्यान्डसँग खेल्नेछ । न्युजिल्यान्ड आज विजयी हुँदा ७ अंक हुनेछ । जुन सेमिफाइनल खेल्न पर्याप्त बन्नेछ ।

यता इंग्ल्यान्डले पहिलो खेलमा अफगानिस्तानलाई ५ विकेटले हराउँदा आयरल्यान्डसँग वर्षाको कारण ५ रनले पराजित भएको थियो । अष्ट्रेलियासँग अंक बाँडेको थियो ।

गतवर्ष विश्वकपको सेमिफाइनलमा न्युजिल्यान्डले इंग्ल्यान्डलाई ५ विकेटले हराउँदै फाइनलमा पुगेको थियो । इंग्ल्यान्ड त्यसको बदला लिने सोचमा हुनेछ । त्यस खेलका हिरो डर्याल मिचेल पनि टोलीमा फर्किएका छन् । न्युजिल्यान्ड उच्च मनोबलका साथ मैदान प्रवेश गर्ने ।

यता इंग्ल्यान्ड यस खेलमा जित्नै पर्ने हुन्छ । इंग्ल्यान्डले अन्तिम खेल शनिबार श्रीलंकासँग खेल्नेछ । ७ अंकका साथ सेमिफाइनल खेल्न जित्नै पर्ने हुन्छ । इंग्ल्यान्ड आजको खेलमा पराजित हुँदा अष्ट्रेलिया सेमिफाइनलमा पुग्ने सम्भावना उच्च हुनेछ । अष्ट्रेलिया ५ अंकका साथ दोस्रो स्थानमा छ ।

अन्तिम खेल अष्ट्रेलियाले शुक्रबार अफगानिस्तानसँग खेल्नेछ । यदि इंग्ल्यान्ड आज विजयी हुँदा यी तीन टोलीको नै ७-७ अंक हुने सम्भावना छ । जसमा नेटरनरेट निर्णायक बन्नसक्छ । न्युजिल्यान्डको नेटरनरेट प्लस ३.८५०, अष्ट्रेलियाको माइनस ०.३०४ र इंग्ल्यान्डको प्लस २.२३९ छ ।

न्युजिल्यान्डले बलिङ र ब्याटिङ दुबैमा सानदार प्रदर्शन गर्दै आएको छ । बंगलादेशविरुद्ध कठिन परिस्थीतिमा ग्लेन फिलिप्सले शतक हानेका थिए । अष्ट्रेलियाविरुद्ध फिन एलेनले विष्फोटक अर्धशतक हानेका थिए ।

यी ब्याटरको खेल्ने शैलीनै विष्फोटक हुन् । अर्कोतर्फ तीव्र गतिको बलिङ राम्रोसँग खेल्ने गर्दछन् । त्यसैले इंग्ल्यान्डलाई निराश बनाउन सक्छन् । अर्का ओपनर डेभन कन्वे भरपर्दा ब्याटर हुन् । उनले अष्ट्रेलियालाई हराउन ९२ रनको सानदार इनिङ खेलेका थिए ।

कन्वे, फिलिप्स र एलेनको कारण न्युजिल्यान्डको ब्याटिङ मजबुत बनेको छ । कप्तान केन विलियम्सनले अपेक्षा अनुसार प्रदर्शन गर्न सकेका छैनन् । प्रमुख हतियार विलियम्सनबाट राम्रो प्रदर्शन चाहन्छ । जेम्श निसम र मिचेल सान्टनार फिनिसर हुन् । तल्लोक्रम ब्याटिङ न्युजिल्यान्डको कमजोरीको रुपमा रहेका छन् ।

तीव्र गतिका बलरमा ट्रेन्ट बोल्ट, टिम साउथी र लोकी फर्गुसनको जोडी लगातार हाबी हुँदै आएका छन् । यी तीन बलरमा गती र स्वींग धेरै राम्रो छ । त्यसैले इंग्ल्यान्डका ब्याटरलाई पुन निराश बनाउन सक्छन् । स्पिनरमा ईश सोधी र सान्टनारको जोडीले निरन्तरता पाउनेछ ।

यता इंग्ल्यान्ड नाम अनुसार खेल्ने हो भने जित निकाल्न कठिन देखिदैन । ओपनर जस बटलर र एलेक्स हेल्सबाट राम्रो सुरुवात चाहन्छ । प्रमुख हतियार रहेका बटलर विष्फोटक इनिङ खेल्न सकेका छैनन् ।

उनी महत्वपूर्ण खेलमा चल्ने इंग्ल्यान्डले विश्वास राखेको छ । त्यसपछिका डेविड मलान र बेन स्टोक्सबाट आक्रामक र ठूलो इनिङ चाहन्छ । यी दुई ब्याटरको पनि प्रदर्शन राम्रो छैन । खुलेर खेल्न सकेका छैनन् ।

त्यसपछि भने इंग्ल्यान्डको ब्याटिङ झनै विष्फोटकले भरिपूर्ण छ । लियाम लिभिङस्टोन, मोईन अली र साम करन हुनेछन् । यी तीन ब्याटर थोरै बलमा धेरै रन बनाउन सक्छन् । लिभिङस्टोन घातक बन्न सक्ने खेलाडी हुन् । शीर्षक्रमका ब्याटरले बढी जिम्मेवारीका साथ खेल्नुपर्ने हुन्छ ।

इंग्ल्यान्डको तीव्र गतिको बलरमा मार्कवुड, क्रिस वोक्स र साम करन हुनेछन् । साम करनले लगातार राम्रो प्रदर्शन गर्दै आएका छन् । मार्क वुड आफ्नो गतीमा पुन फसाउन चाहन्छन् । स्पिनरमा मोईन अली हुनेछन् । बेन स्टोक्स र लियाम लिभिङस्टोन पार्टटाइम बलर हुन् ।

आजको पहिलो खेलमा अफगानिस्तान र श्रीलंकाबीच प्रतिस्पर्धा हुँदैछ । खेल नेपाली समय अनुसार बिहान ९ ः ४५ मा ब्रिस्बेनमै सुरुहुनेछ ।

हेड टु हेड :

इंग्ल्यान्ड र न्युजिल्यान्डबीच हालसम्म टि२० आईमा कुल २३ खेल भएका छन् । जसमा इंग्ल्यान्ड १३ र न्युजिल्यान्ड ८ खेलमा विजयी भएका छन् । पछिल्ला पाँच भेटमा न्युजिल्यान्ड तीन र इंग्ल्यान्ड दुई पटक विजयी भएका छन् । पछिल्लो पटक गतवर्ष सेमिफाइनलमा भिडेका थिए ।

अंक तालिका

सुपर १२ को समूह ए मा न्युजिल्यान्ड ३ खेलमा २ मा जितसहित ५ अंकका साथ शीर्ष स्थानमा छ । अष्ट्रेलिया ४ खेलमा २ मा जित, १ मा हार र १ खेलमा ५ अंकका साथ नेटरनरेटको कारण दोस्रो स्थानमा छ ।

इंग्ल्यान्ड ३ खेलमा १ मा जित, १ मा हार र १ खेल रद्ध हुँदा ३ अंकका साथ तेस्रो स्थानमा छ । आयरल्यान्ड ४ खेलमा १ मा जित, २ मा हार र १ खेलमा अंक बाँड्दै चौथो स्थानमा छ । अफगानिस्तान ३ खेलमा १ मा हार र दुई खेलमा अंक बाँड्दै पाँचौं स्थानमा छ । श्रीलंका ३ खेलमा १ मा जित र २ मा हार सहित पुछारमा छ ।

सुपर १२ को समूह बी मा दक्षिण अफ्रिका ३ खेलमा २ मा जित र १ मा हार सहित ५ अंकका साथ शीर्ष स्थानमा छ । भारत ३ खेलमा २ मा जित र १ मा हारका साथ ४ अंक जोड्दै दोस्रो स्थानमा छ ।

बंगलादेश ३ खेलमा २ मा जित र १ मा हार सहित ४ अंक जोड्दै तेस्रो स्थानमा छ । जिम्बावेले ३ खेलमा १ मा जित र १ मा हार सहित ३ अंकका साथ चौथो स्थानमा छ । पाकिस्तान ३ खेलमा २ मा हार र १ मा जित सहित पाँचौं स्थानमा छ । नेदरल्यान्ड्स तीनै खेलमा पराजित हुँदै पुछारमा छ।