काठमाडौं (हाम्रो खेलकुद) – आइसिसी यु१९ महिला टोलीले अन्तिम टि२० खेलमा नेपाली खेलाडी सम्मिलित क्यान मिक्स्ड ११ लाई १ सय ७१ रनको बलियो विजयी लक्ष्य दिएको छ ।

मुलपानी क्रिकेट मैदानमा टस जितेर पहिला ब्याटिङ रोजेको आइसिसी यू१९ टोलीले निर्धारित २० ओभरमा ४ विकेट गुमाउँदै १ सय ७० रन बनायो । आइसिसीको लागि ओपनर साची धडवालले ३७ बलमा ७ चौकासहित सर्वाधिक ४५ रन बनाइन् ।

सुरुवाती दुई खेलमा अवसर नपाएकी आश्मा पुलामी मगरलाई आइसिसीले आज ओपनरको रुपमा मैदान उतारेको थियो । आश्माले १८ बलमा ३ चौकासहित १६ रन बनाइन् । पहिलो विकेटका लागि साचीसँग ५.२ ओभरमा ३६ रनको साझेदारी गरेकी थिइन् ।

एलिना खान ३२ बलमा ७ चौकासहित ४१ रनमा आउट भइन् । सृष्टी जैशी ११ बलमा २ चौकासहित १४ रनमा आउट भइन् । तीर्थ सतिश २१ बलमा ६ चौकासहित ३७ रनमा अविजित रहिन् ।

क्यान मिक्स्ड ११ को लागि कप्तान अप्सरी बेगमले ३ ओभरमा २३ रन खर्चेर २ विकेट लिइन् । संगिता राई र खुशी डंगोलले एक एक विकेट लिए ।

आइसिसीले यू१९ एसिया विश्वकप छनोटमा उत्कृष्ट प्रदर्शन गर्ने विभिन्न देशका १३ खेलाडी समेटेर टोली बनाएको छ । नेपालको कप्तान कृतिका मरासिनी, सृष्टी जैशी र आश्मा पुलामी मगर छन् ।

आइसिसी पहिलो खेलमा मेरिलेबोन क्रिकेट क्लबसँग १६ रनले पराजित भएको थियो । दोस्रो खेलमा टियुमा मिक्स्ड ११ लाई १० विकेटले हराएको थियो ।